பாதுகாப்புப் புறக்கணிப்பால் விபத்து: ரஷ்ய சாகச வீராங்கனை வீழ்ச்சி வழக்கில் சுவிஸ் நீதிமன்றம் அதிரடித் தீர்ப்பு!

கடந்த 2020 ஜனவரி மாதம் லோசானில் உள்ள VaudoiseAréna அரங்கில் நடைபெற்ற தொடக்க விழா ஒத்திகையின் போது, 35 வயதான ரஷ்ய சாகச வீராங்கனை Olga Sevastianova5 மீட்டர் உயரத்தில் கயிற்றில் தொங்கியபடி சாகசம் செய்தபோது எதிர்பாராதவிதமாகக் கீழே விழுந்தார். 

இந்தக் கோர விபத்தில் அவரது தலை, கல்லீரல் மற்றும் எலும்புகளில் பலத்த காயங்கள் ஏற்பட்டு உயிருக்கு ஆபத்தான நிலையில் மருத்துவமனையில் அனுமதிக்கப்பட்டார்.

இது தொடர்பாக லோசான் காவல்துறை மற்றும் நீதிமன்றம் நடத்திய தீவிர விசாரணையில், வீராங்கனையை காற்றில் உயர்த்தப் பயன்படுத்தப்பட்ட இயந்திரக் கப்பி (Winch) தவறாகப் பொருத்தப்பட்டதே விபத்துக்குக் காரணம் எனக் கண்டறியப்பட்டது.

 இதையடுத்து, பாதுகாப்பு கடமையைப் புறக்கணித்து அலட்சியமாகச் செயல்பட்டதற்காக ஜெர்மன் பேசும் சுவிஸ் பகுதியைச் சேர்ந்த ஈவென்ட் நிறுவனத் தொழில்நுட்ப வல்லுநர்கள் இருவருக்குக் கவனக்குறைவால் பெரும் காயம் ஏற்படுத்திய குற்றத்திற்காக 9,000 சுவிஸ் பிராங்க் அபராதம் விதித்து லோசான் குற்றவியல் நீதிமன்றம் தீர்ப்பளித்துள்ளது. அதேவேளை, வழக்கில் குற்றம்சாட்டப்பட்டிருந்த வீராங்கனையின் கணவர் உட்பட மற்ற மூவர் விடுவிக்கப்பட்டனர்.