ஐரோப்பியப் பந்தயத்தில் அஜித்தின் கார் விபத்து: நல்வாய்ப்பாகக் காயமின்றித் தப்பினார்!

பிரபல தமிழ் திரை நட்சத்திரமும் பந்தய வீரருமான நடிகர் அஜித் குமார், பன்னாட்டு கார் பந்தயத் தொடரில் எதிர்பாராத விதமாக விபத்தைச் சந்தித்துள்ளார்.

GT4 European Series பந்தயத் தொடரில் பங்கேற்று வரும் நடிகர் அஜித் குமார், இத்தாலியின் Misano ஓடுதளத்தில் நடந்த சுற்றின் போது எதிர்பாராத விதமாகப் பாதையில் நின்று கொண்டிருந்த மற்றொரு வாகனத்தின் மீது மோதி விபத்துக்குள்ளானார்.

பந்தயக் கார் கடுமையான சேதமடைந்தபோதிலும், பாதுகாப்பு உத்திகளின் காரணமாக நடிகர் அஜித் குமார் எவ்விதக் காயமுமின்றி அதிர்ஷ்டவசமாக உயிர் தப்பினார்.

விபத்து நடந்த உடனேயே எவ்விதப் பதற்றமும் இன்றி காரில் இருந்து இறங்கிய அஜித், பந்தயப் பாதையில் சிதறிக் கிடந்த பாகங்களை அகற்றிப் பாதையைச் சுத்தம் செய்யப் பந்தய அதிகாரிகளுக்கு உதவினார்.

இந்தச் செயல் தொடர்பான வீடியோவை வெளியிட்ட போட்டிக் குழுவினர், விளையாட்டின் மீது அவர் கொண்டுள்ள மரியாதையையும் பணிவையும் பாராட்டி வாழ்த்துகளைத் தெரிவித்துள்ளனர்.

காயங்கள் எதுவுமின்றி அஜித் குமார் பாதுகாப்பாக இருப்பதாகவும், அவர் அடுத்தகட்டப் போட்டிகளுக்குத் தயாராகி வருவதாகவும் பந்தய நிர்வாகத் தரப்பில் தெரிவிக்கப்பட்டுள்ளது.