திரையரங்குகளில் நேரடியாக வெளியாகும் அஜித்தின் 'கிளாடியேட்டர்ஸ்' டிரெய்லர்: படக்குழுவின் அதிரடி அறிவிப்பு!

தமிழ் திரையுலகின் முன்னணி நட்சத்திரமும் தொழில்முறை பந்தய வீரருமான அஜித் குமாரின் கார் பந்தய பயணத்தை மையமாகக் கொண்டு உருவாக்கப்பட்டுள்ள 'கிளாடியேட்டர்ஸ்'ஆவணப்படத்தின் சிறப்பு டிரெய்லர் நேரடியாகத் திரையரங்குகளில் திரையிடப்படவுள்ளதாகப் படக்குழு அதிகாரப்பூர்வமாக அறிவித்துள்ளது.

இயக்குநர் ஏ.எல். விஜய் இயக்கத்தில் உருவாகியுள்ள இந்த ஆவணப்படத்தின் 3 நிமிடங்களுக்கும் அதிகமான நீளம் கொண்ட சிறப்பு டிரெய்லர், செப்டம்பர் 6 ஆம் திகதி மாலை 6:40 மணிக்குத் தமிழ்நாடு மற்றும் புதுச்சேரியில் உள்ள தேர்வு செய்யப்பட்ட திரையரங்குகளில் பிரம்மாண்டமாகத் திரையிடப்படவுள்ளது.

அஜித் குமாரின் 'அஜித் குமார் ரேசிங்' அணியின் பின்னணி, சர்வதேசப் பந்தயக் களங்களில் அவர் சந்தித்த சவால்கள் மற்றும் அவரின் மோட்டார் ஸ்போர்ட்ஸ் பயணத்தை மையமாகக் கொண்டு இத்திரைப்படம் உருவாக்கப்பட்டுள்ளது. 'கிரீடம்' திரைப்படத்திற்குப் பிறகு இயக்குநர் ஏ.எல். விஜய் மற்றும் இசையமைப்பாளர் ஜி.வி. பிரகாஷ் குமார் ஆகியோர் அஜித் குமாருடன் மீண்டும் இணைந்துள்ள இந்தத் திட்டத்தை ஷாலினி அஜித் குமார் தயாரித்துள்ளார்.

ஒரு முன்னணி நடிகரின் ஆவணப்பட டிரெய்லர் நேரடியாகத் திரையரங்குகளில் பிரத்யேகமாகக் திரையிடப்படுவது தமிழ் சினிமாவில் அரிதான ஒன்று என்பதால், அஜித் ரசிகர்கள் மத்தியில் பெரும் எதிர்பார்ப்பும் உற்சாகமும் ஏற்பட்டுள்ளது.