சுவிட்சர்லாந்தில் கொடூர ரான்சம்வேர் தாக்குதல்: உக்ரைன் ஐடி நிபுணருக்கு 12 ஆண்டுகள் சிறை!

சுவிட்சர்லாந்தின் முன்னணி நிறுவனங்கள் மீது கொடூரமான ரான்சம்வேர் (Ransomware) கணினித் தாக்குதல்களை நடத்தி மிரட்டிப் பணம் பறிக்க முயன்ற உக்ரைனைச் சேர்ந்த 52 வயது தகவல் தொழில்நுட்ப நிபுணருக்கு சூரிச் நீதிமன்றம் 12 ஆண்டுகள் மற்றும் 9 மாதங்கள் சிறைத்தண்டனை விதித்துத் தீர்ப்பளித்துள்ளது.

சுவிட்சர்லாந்தின் ரயில் தயாரிப்பு நிறுவனமான ஸ்டாட்லர் ரயில் (Stadler Rail) உட்பட பல முன்னணி சர்வதேச நிறுவனங்களின் கணினி அமைப்புகளை முடக்கி, சுமார் 100 மில்லியன் சுவிஸ் பிராங் வரை இழப்பை ஏற்படுத்திய வழக்கில் இந்த அதிரடித் தீர்ப்பு வழங்கப்பட்டுள்ளது.

 குற்றம் சாட்டப்பட்ட உக்ரைனிய நிபுணர், 'லாக்கர்கோகா' (Lockergoga) மற்றும் 'மெகாகோர்டெக்ஸ்' (Megacortex) போன்ற மிகவும் ஆபத்தான ரான்சம்வேர் மென்பொருள்களை உருவாக்கிய முதன்மை நிரலாளர் (Developer) என்பது விசாரணையில் நிரூபிக்கப்பட்டுள்ளது. 

தான் வெறும் தொழில்நுட்ப ஆலோசகராக மட்டுமே செயல்பட்டதாக குற்றவாளி வாதிட்டபோதிலும், அவரிடமிருந்து கைப்பற்றப்பட்ட தரவுகளில் மிரட்டல் கடிதங்களும் கண்டெடுக்கப்பட்டதால் நீதிமன்றம் அவரது வாதத்தை நிராகரித்திரத்திருந்தமை குறிப்பிடத்தக்கது.