அப்பாவை உரித்து வைத்திருக்கும் மகன்: ஜேசன் சஞ்சய் குறித்து சிரஞ்சீவி நெகிழ்ச்சிப் பேச்சு!

திரையுலகின் பிரம்மாண்ட நிகழ்வாக நடைபெற்ற 'சிக்மா' விருதுகள் மற்றும் அறிமுக விழாவில் சிறப்பு விருந்தினராகக் கலந்துகொண்ட சிரஞ்சீவி மேடையில் பேசுகையில், ஜேசன் சஞ்சயின் எளிமையையும் திறமையையும் சுட்டிக்காட்டிப் நெகிழ்ந்து பேசினார்.

இதுகுறித்து அவர் பேசுகையில், "ஜேசன் சஞ்சயைப் பார்க்கும்போது எனக்கு 90-களின் தொடக்கத்தில் பார்த்த இளம் விஜய் தான் நினைவுக்கு வருகிறார். அதே சுறுசுறுப்பு, அதே எளிமை, அமைதியான அணுகுமுறை என 90-களின் விஜய்யை அப்படியே உரித்து வைத்திருக்கிறார் ஜேசன். ஒரு முன்னணி நடிகரின் மகனாக இருந்தாலும், தனது சொந்த உழைப்பால் இயக்குநராகத் தடம்பதிக்க அவர் எடுத்துள்ள முயற்சி பாராட்டுக்குரியது. அவரது திரையுலகப் பயணம் மிகப்பெரிய வெற்றியடைய வாழ்த்துகிறேன்" என்று கூறினார்.

தமிழ் சினிமாவில் முன்னணி நடிகராக இருக்கும் விஜய்யின் மகன் ஜேசன் சஞ்சய், லைகா புரொடக்ஷன்ஸ் தயாரிப்பில் தனது முதல் திரைப்படத்தை இயக்கி வருகிறார் என்பது குறிப்பிடத்தக்கது. மெகாஸ்டார் சிரஞ்சீவியின் இந்தப் பாராட்டு தற்போது சமூக வலைதளங்களில் வைரலாகி வருகிறது.