ஈபிள் கோபுரத்தில் சர்ச்சை: பெண் ஊழியர்கள் புறக்கணிப்புக்கு எதிர்ப்பு – ஊழியர்கள் போராட்டத்தால் கோபுரம் மூடல்!

பிரான்ஸ் நாட்டின் தலைநகர் பாரிஸில் உள்ள புகழ்பெற்ற ஈபிள் கோபுரத்திற்குப் ஆன்மீகக் குழுவினர் வருகை தந்தபோது, பெண் ஊழியர்களைப் பணிச் செய்ய விடாமல் ஒதுக்கி வைக்குமாறு கூறப்பட்டதாகக் குற்றம்சாட்டி ஊழியர்கள் திடீர் போராட்டத்தில் ஈடுபட்டனர். இதன் காரணமாக சுற்றுலாப் பயணிகளின் வருகை நிறுத்தப்பட்டு ஈபிள் கோபுரம் தற்காலிகமாக மூடப்பட்டது.

பாரிஸில் நடைபெற்ற புதிய கோயில் திறப்பு விழாவில் பங்கேற்பதற்காக BAPS அமைப்பைச் சேர்ந்த சுமார் 100 பேர் கொண்ட ஆன்மீகக் குழுவினர் ஈபிள் கோபுரத்தைப் பார்வையிட வந்தனர்.

அந்த அமைப்பினர் வருகையின்போது, அவர்களுடன் தொடர்புகொள்வதைத் தவிர்க்கும் வகையில் பெண் ஊழியர்களை வேலை செய்யுமிடத்திலிருந்து விலகி இருக்குமாறும், அவர்களுக்குப் பதிலாக ஆண் ஊழியர்களை நியமிக்குமாறும் நிர்வாகத் தரப்பில் அறிவுறுத்தப்பட்டதாகத் தொழிற்சங்கம் குற்றம்சாட்டியுள்ளது.

பாலின அடிப்படையில் பெண் ஊழியர்கள் புறக்கணிக்கப்பட்டதற்கும், அவர்களைப் பணியிடத்தில் பார்க்க முடியாதவாறு மறைக்க முயன்றதற்கும் எதிர்ப்பு தெரிவித்து ஈபிள் கோபுர ஊழியர்கள் பணிப்புறக்கணிப்புப் போராட்டத்தில் ஈடுபட்டனர்.

ஈபிள் கோபுரத்தை நிர்வாகிக்கும் 'SETE' நிறுவனம், ஆன்மீக அமைப்பின் கோரிக்கையை ஏற்று பெண் ஊழியர்களின் பங்களிப்பைக் குறைக்க முயன்றது தவறுதான் என்றும், இத்தகைய நிபந்தனைகளை ஏற்றிருக்கக் கூடாது என்றும் ஒப்புக்கொண்டு மன்னிப்பு கோரியுள்ளது.

இச்சம்பவம் பிரான்ஸ் அரசியலிலும் பெரும் பரபரப்பை ஏற்படுத்தியுள்ளது. "பிரான்சில் பாலின சமத்துவமே முதன்மையானது; வெளிநாட்டுப் பிரதிநிதிகளுக்காகப் பெண்களை ஒதுக்கி வைப்பதை ஏற்றுக்கொள்ள முடியாது" என பாரிஸ் நகர மேயர் மற்றும் நாடாளுமன்றத் தலைவர் ஆகியோர் கடும் கண்டனம் தெரிவித்து விசாரணைக்கு உத்தரவிட்டுள்ளனர்.

அதேவேளையில், சம்பந்தப்பட்ட ஆன்மீக அமைப்பு இந்தச் சம்பவத்திற்காகத் தனது வருத்தத்தையும் மன்னிப்பையும் தெரிவித்துள்ளது.