சுவிட்சர்லாந்து ராணுவ வீரர்களின் உடல்தகுதி சரிவு: சுவிஸ் கூட்டாட்சி அலுவலக ஆய்வில் அதிர்ச்சி தகவல்!

சுவிட்சர்லாந்து ராணுவ வீரர்களின் உடல்தகுதி தொடர்ந்து சரிவடைந்து வருவதாகவும், அவர்கள் தேவையான அளவுக்கு உடல்தகுதியுடன் இல்லை என்றும் விளையாட்டுக்கான சுவிஸ் கூட்டாட்சி அலுவலகத்தின் புதிய ஆய்வு அதிர்ச்சி தகவலை வெளியிட்டுள்ளது.

சுவிட்சர்லாந்து விளையாட்டு அமைச்சகம், சுவிஸ் ராணுவப் படை மற்றும் சூரிச் பல்கலைக்கழகம் இணைந்து நடத்திய புதிய ஆய்வில், கடந்த 2006-ஆம் ஆண்டிலிருந்து சுவிஸ் ராணுவ வீரர்களின் சராசரி உடல்தகுதிப் புள்ளிகள் 74.2-ல் இருந்து 70.4 ஆகக் குறைந்துள்ளது கண்டறியப்பட்டுள்ளது.

 சுமார் 7 லட்சம் ராணுவ வீரர்களின் தரவுகளைக் கொண்டு நடத்தப்பட்ட ஆய்வில் இந்த முடிவு தெரியவந்துள்ளது. ஆச்சரியப்படும் விதமாக, உடல்தகுதி சோதனையில் மதிப்பெண்கள் குறைந்தபோதிலும், ராணுவ வீரர்கள் தங்களை மிகவும் ஆரோக்கியமாகவும் தகுதியுடனும் உணர்வதாகத் தெரிவித்துள்ளனர்.

 2006-ஆம் ஆண்டில் 40 சதவீதமாக இருந்த இந்த சுய நம்பிக்கை தற்போது 56 சதவீதமாக உயர்ந்துள்ளது. அதேவேளையில், ஆண் வீரர்களின் உடல்தகுதி குறைந்திருந்தாலும், சுவிஸ் ராணுவத்தில் உள்ள பெண் வீரர்களின் உடல்தகுதி மதிப்பெண்கள் கணிசமாக அதிகரித்துள்ளது இந்த ஆய்வில் குறிப்பிடத்தக்க அம்சமாகும்.