47 வயதில் முதல் 'புல்-அப்ஸ்' சாதனை: ஃபிட்னஸ் பயணத்தைப் பகிர்ந்து நெகிழ்ந்த நடிகை ஜோதிகா!

வயது என்பது வெறும் எண் மட்டுமே என்பதை மீண்டும் ஒருமுறை நிரூபித்திருக்கிறார் நடிகை ஜோதிகா. திரைத்துறையில் பிஸியாக இருந்தாலும், தனது ஆரோக்கியத்திலும், உடற்பயிற்சியிலும் எப்போதும் அதிக கவனம் செலுத்தும் ஜோதிகா, தற்போது 47 வயதில் செய்துள்ள ஒரு கடினமான உடற்பயிற்சி சாதனை இணையத்தில் வைரலாகி வருகிறது.

கடந்த மூன்று ஆண்டுகளாகத் தீவிரப் பயிற்சிகளை மேற்கொண்டு வரும் ஜோதிகா, தற்போது முதன்முறையாகத் தனது பயிற்சியாளர் மகேஷ் கனேகர் (Mahesh Ghanekar) மேற்பார்வையில் 'புல்-அப்ஸ்' (Pull-ups) செய்து அசத்தியுள்ளார். இது குறித்துப் பேசிய ஜோதிகா, 'எனது 44-வது வயதில் ஆரம்பித்த இந்த உடற்பயிற்சி பயணம், இன்று 47 வயதில் இந்த நிலையை எட்டியிருப்பது மிகுந்த மகிழ்ச்சியைத் தருகிறது' என்று நெகிழ்ச்சியுடன் பகிர்ந்துள்ளார்.

இது குறித்து அவர் பேசுகையில்... 

உறுதி :எனது பயிற்சியாளர் எனக்குக் கற்றுக்கொடுத்த மிக முக்கியமான பாடம், 'தோற்றத்தை விட வலிமைக்கே முக்கியத்துவம் கொடு' என்பதுதான். எடையைக் குறைப்பது ஒரு பக்கவிளைவு மட்டுமே, உண்மையான நோக்கம் உடல் வலிமைதான்" என்று ஜோதிகா கூறியுள்ளார்.

தினசரி வழக்கம்: இவர் ஒரு 'மார்னிங் பெர்சன்' (Morning person). அதிகாலையில் எழுந்து ஆப்பிள் சாப்பிட்டுவிட்டு, வாரத்திற்கு 4 முதல் 5 நாட்கள் ஜிம்மிற்குச் செல்வதை வழக்கமாகக் கொண்டுள்ளார்.

தீவிரப் பயிற்சி: புல்-அப்ஸ் மட்டுமல்லாமல், வெயிட்டட் புல்-அப்ஸ் (weighted pull-ups), தொங்கிக்கொண்டே கால்களை உயர்த்தும் பயிற்சி (hanging leg raises), மற்றும் யோகா சக்கரத்தில் சமநிலை காக்கும் பயிற்சிகளையும் அவர் மிக எளிதாகச் செய்து அனைவரையும் வியப்பில் ஆழ்த்தியுள்ளார்.

உடற்பயிற்சி நிபுணர்கள் ஜோதிகாவின் இந்தச் சாதனையைப் பாராட்டியுள்ளனர். 'ஒருவர் தனது உடல் எடையைத் தாங்கி புல்-அப்ஸ் செய்வது என்பது முதுகு, தோள்பட்டை மற்றும் கைகளின் அபரிமிதமான வலிமையைக் குறிக்கிறது. 40 வயதிற்குப் பிறகும் இத்தகைய வலிமையை வளர்ப்பது எலும்பு ஆரோக்கியத்திற்கும், வளர்சிதை மாற்றத்திற்கும் மிகவும் சிறந்தது' என அவர்கள் குறிப்பிடுகின்றனர்.

முயற்சி இருந்தால் எதையும் சாதிக்கலாம் என்பதற்கு ஜோதிகாவே சிறந்த உதாரணம். அவரது இந்த ஊக்கமளிக்கும் வீடியோ, வயது ஒரு தடையல்ல என்பதை உணர்த்தும் வகையில் பலருக்கும் ஒரு 'பிட்னஸ் இன்ஸ்பிரேஷனாக' மாறியுள்ளது. இதைப் பார்த்த ரசிகர்கள் மற்றும் திரையுலகினர், ஜோதிகாவின் அர்ப்பணிப்பைக் கண்டு வியந்து தங்களது வாழ்த்துகளைத் தெரிவித்து வருகின்றனர்.