ஜி.வி.பிரகாஷ் நடிக்கும் ‘நிஞ்சா’ - இன்று முதல் படப்பிடிப்பு தொடக்கம்!

தமிழ் திரையுலகில் முன்னணி இசையமைப்பாளராகவும், கதாநாயகனாகவும் வலம் வரும் ஜி.வி.பிரகாஷ் குமார் நடிக்கும் புதிய திரைப்படத்திற்கு ‘நிஞ்சா’ என பெயரிடப்பட்டுள்ளது. ரசிகர்கள் மத்தியில் பெரும் எதிர்பார்ப்பை ஏற்படுத்தியுள்ள இத்திரைப்படத்தின் படப்பிடிப்பு பூஜையுடன் இன்று முறைப்படி தொடங்கியது.

‘டோரா’ திரைப்படத்தை இயக்கி கவனம் ஈர்த்த இயக்குனர் முருகு இப்படத்தை இயக்குகிறார். ஜி.வி.பிரகாஷ் நடிக்கும் பெரும்பாலான படங்களுக்கு அவரே இசையமைத்து வரும் சூழலில், இத்திரைப்படத்திற்கு பிரபல இசையமைப்பாளர் ஷான் ரோல்டன் இசையமைக்கிறார். இவருக்கு ஜோடியாக பிரார்த்தனா நாதன் கதாநாயகியாக அறிமுகமாகிறார்.

‘சால்ஜர்ஸ் ஃபேக்டரி’ மற்றும் ‘லேர்ன் என் டீச் புரொடக்ஷன்ஸ்’ நிறுவனங்கள் இணைந்து தயாரிக்கும் இப்படத்திற்கு ஹரிஷ் கண்ணன் ஒளிப்பதிவு செய்ய, கணேஷ் சிவா படத்தொகுப்புப் பணிகளைக் கவனிக்கின்றனர்.

சமீபத்தில் வெளியாகி சமூக வலைதளங்களில் வைரலான இப்படத்தின் ஃபர்ஸ்ட் லுக் போஸ்டர் ரசிகர்களிடம் நல்ல வரவேற்பைப் பெற்றுள்ளது. முதல்கட்டப் படப்பிடிப்பு சென்னையில் விறுவிறுப்பாகத் தொடங்கப்பட்டுள்ள நிலையில், அடுத்தடுத்த அறிவிப்புகள் விரைவில் வெளியாகும் என படக்குழுவினர் தெரிவித்துள்ளனர்.