கனடாவில் ‘ஜெயிலர் 2’ திரைப்பட திரையரங்கக் காட்சிகள் தற்காலிக ரத்து

கடந்த 2023-ஆம் ஆண்டு வெளியாகி மாபெரும் வெற்றி பெற்ற ‘ஜெயிலர்’ படத்தின் இரண்டாம் பாகமாக, இயக்குநர் நெல்சன் திலீப்குமார் இயக்கத்தில் உருவான ‘ஜெயிலர் 2’ திரைப்படம் கடந்த அக்டோபர் 15 அன்று உலகம் முழுவதும் வெளியானது. படம் வெளியான 6 நாட்களிலேயே உலகளவில் ரூ.540 கோடிக்கும் மேல் வசூல் செய்து, 2026-ஆம் ஆண்டின் அதிக வசூல் செய்த மூன்றாவது இந்தியத் திரைப்படம் என்ற பெருமையைப் பெற்றுள்ளது.

படம் வெளியாகி ஒரு வாரமே ஆன நிலையில், கனடாவின் பிரபல திரையரங்கு நிறுவனமான 'யார்க் சினிமாஸ்' மற்றும் வட அமெரிக்க விநியோகஸ்தர்களுக்கு இடையே திடீர் சிக்கல் ஏற்பட்டுள்ளது. டிஜிட்டல் முறையில் திரைப்படங்களை திரையரங்குகளில் இயக்குவதற்குத் தேவையான 'கே.டி.எம்' எனப்படும் டிஜிட்டல் அனுமதி குறியீடுகள் விநியோகஸ்தர்களிடம் இருந்து முறையாகத் திரையரங்குகளுக்கு வழங்கப்படவில்லை.

இந்தத் தொழில்நுட்ப மற்றும் விநியோகச் சிக்கல் காரணமாக, கனடாவில் உள்ள யார்க் சினிமாஸ் திரையரங்குகளில் ‘ஜெயிலர் 2’ திரைப்படத்தின் காட்சிகள் அனைத்தும் அதிரடியாக ரத்து செய்யப்படுவதாக அந்த நிறுவனம் அதிகாரப்பூர்வமாக அறிவித்துள்ளது.

அங்குள்ள தமிழர்கள் மற்றும் புலம்பெயர்ந்த இந்தியர்கள் மத்தியில் ‘ஜெயிலர் 2’ படத்திற்கு மிகப்பெரிய வரவேற்பு இருந்த நிலையில், இந்தத் திடீர் ரத்து அறிவிப்பு ரசிகர்களைப் பெரும் ஏமாற்றத்தில் ஆழ்த்தியுள்ளது. ஏற்கனவே டிக்கெட் முன்பதிவு செய்தவர்களுக்குப் பணத்தைத் திரும்ப வழங்குவதற்கான ஏற்பாடுகளைத் திரையரங்கு நிர்வாகம் செய்து வருகிறது.

இருப்பினும், இந்த விநியோகச் சிக்கல் விரைவில் தீர்க்கப்பட்டு, இன்னும் ஓரிரு நாட்களில் கனடாவில் ‘ஜெயிலர் 2’ மீண்டும் திரையிடப்படும் என்று சினிமா வட்டாரங்கள் தெரிவிக்கின்றன.