'ஜனநாயகன்' திரைப்படம் இணையத்தில் வெளியான வழக்கு - எடிட்டர் மீதான குண்டர் சட்டம் ரத்து

முதலமைச்சர் சி. ஜோசப் விஜய் நடிப்பில் உருவான 'ஜனநாயகன்' திரைப்படம் இணையத்தில் வெளியான விவகாரத்தில், உதவிப் படத்தொகுப்பாளர் உமாசங்கர் மீது விதிக்கப்பட்ட குண்டர் சட்டத்தை ரத்து செய்து சென்னை உயர்நீதிமன்றம் உத்தரவிட்டுள்ளது.

பெரிதும் எதிர்பார்க்கப்பட்ட 'ஜனநாயகன்' திரைப்படத்தின் சில பகுதிகள் இணையதளங்களில் சட்டவிரோதமாக வெளியாகி பரபரப்பை ஏற்படுத்தின. இது குறித்துத் தயாரிப்புத் தரப்பில் அளிக்கப்பட்ட புகாரின் அடிப்படையில் விசாரணை நடத்திய சென்னை சைபர் கிரைம் பொலிஸார், சென்னை திருவேற்காட்டைச் சேர்ந்த ஃப்ரீலான்ஸ் எடிட்டர் உமாசங்கரை கைது செய்தனர்.

தொடர்ந்து, சென்னை மாநகர காவல் ஆணையரின் உத்தரவின் பேரில், ஜூலை 30-ஆம் தேதி உமாசங்கர் குண்டர் தடுப்புக் காவல் சட்டத்தின் கீழ் புழல் சிறையில் அடைக்கப்பட்டார்.

இவ்வ உத்தரவை எதிர்த்து உமாசங்கரின் சகோதரி ரேணுகா தேவி சென்னை உயர்நீதிமன்றத்தில் ஆட்கொணர்வு மனு தாக்கல் செய்தார். "முறையான சான்றுகள் மற்றும் தீவிர பரிசீலனையின்றி, அவசர அவசரமாகக் குண்டர் சட்டம் பிரயோகிக்கப்பட்டுள்ளது" என அந்த மனுவில் வாதிடப்பட்டது.

இந்த மனுவை இன்று விசாரித்த நீதிபதிகள் என். சதீஷ்குமார் மற்றும் கே. ராஜசேகர் அடங்கிய அமர்வு, பொலிஸாரால் பிறப்பிக்கப்பட்ட குண்டர் சட்ட உத்தரவில் உரிய சட்டப்பூர்வ காரணங்கள் இல்லை என்பதைச் சுட்டிக்காட்டி, அதனை ரத்து செய்து தீர்ப்பளித்தது.