FIFA தலைவருக்கு சட்ட நெருக்கடி: சுவிஸ் நீதிமன்றத்தில் வழக்கு தொடர UEFA தீவிரம்!

உலகக் கால்பந்து நிர்வாக அமைப்பான FIFA தலைவர் ஜியானி இன்ஃபான்டினோவுக்கு எதிராக, சுவிட்சர்லாந்து நீதிமன்றங்களில் குற்றவியல் நடவடிக்கை எடுக்க ஐரோப்பிய கால்பந்து கூட்டமைப்பான UEFA தீவிரமாக தயாராகி வருகிறது.  

FIFA உலகக்கோப்பை மற்றும் முக்கியப் போட்டிகளின் வணிக உரிமைகளில் ஒரு பகுதியைத் தனியார் முதலீட்டாளர்களுக்கு விற்பனை செய்வதற்காக 'FIFA Forward Enterprise' என்ற சர்ச்சைக்குரிய திட்டத்தை இன்ஃபான்டினோ முன்வைத்தார். 4.2 பில்லியன் டாலர் மதிப்பிலான இந்த விற்பனை முயற்சியானது, FIFAவின் கவுன்சில் மற்றும் உறுப்பு நாடுகளுடன் முறையான கலந்தாலோசனை இன்றி தன்னிச்சையாக எடுக்கப்பட்ட முடிவு என UEFA குற்றம் சாட்டியுள்ளது.

சுமார் 20 பில்லியன் டாலர் சந்தை மதிப்பு கொண்ட FIFAவின் முக்கிய சொத்துக்கள், வெளிப்படையான ஏல நடவடிக்கை எதுவுமின்றி அடிமாட்டு விலைக்கு விற்கப்பட முயன்றதாகவும், இது மிகப்பெரிய நிர்வாக முறைகேடு என்றும் UEFA வழக்கறிஞர்கள் தெரிவித்துள்ளனர். இந்த விவகாரம் தொடர்பான முக்கிய ஆவணங்களைத் திரட்ட அமெரிக்க நீதிமன்றங்கள் மூலமாகவும் UEFA மனுத் தாக்கல் செய்துள்ளது.

சர்வதேச அளவில் எழுந்த கடும் எதிர்ப்பைத் தொடர்ந்து இந்த விற்பனைத் திட்டம் தற்போது FIFAவால் கைவிடப்பட்டபோதிலும், இன்ஃபான்டினோ மீதான குற்றவியல் நடவடிக்கை மற்றும் சட்டரீதியான அழுத்தங்களைத் தொடர்ந்து முன்னெடுக்க UEFA உறுதியாக உள்ளது.