25 ஆண்டுகள் கழித்து இணையும் மெகா கூட்டணி: 'மூன்வாக்' ரிலீஸ் தேதி அறிவிப்பு!

இந்தியத் திரையுலகின் 'நடன புயல்' பிரபுதேவா மற்றும் 'இசைப்புயல்' ஏ.ஆர்.ரஹ்மான் கூட்டணி சுமார் 25 ஆண்டுகளுக்குப் பிறகு மீண்டும் இணைந்துள்ள Moonwalk திரைப்படத்தின் வெளியீட்டுத் தேதியை படக்குழுவினர் அதிகாரப்பூர்வமாக அறிவித்துள்ளனர்.

முன்னதாக 'காதலன்', 'மின்சார கனவு', 'மிஸ்டர் ரோமியோ' போன்ற பிளாக்பஸ்டர் வெற்றிப் படங்களுக்குப் பிறகு இக்கூட்டணி மீண்டும் ஒன்று சேர்ந்துள்ளதால் ரசிகர்கள் மத்தியில் பெரும் எதிர்பார்ப்பு நிலவி வருகிறது. 'பிஹைண்ட்வுட்ஸ் புரொடக்ஷன்ஸ்' தயாரிப்பில், மனோஜ் என்.எஸ் இயக்கத்தில் உருவாகியுள்ள இத்திரைப்படம், வரும் 2026 தீபாவளி பண்டிகையை முன்னிட்டு உலகம் முழுவதும் திரையரங்குகளில் வெளியாகவுள்ளது.

படத்திற்கு இசையமைத்ததுடன், இதில் இடம்பெற்றுள்ள 5 பாடல்களையும் ஏ.ஆர்.ரஹ்மானே பாடியுள்ளார். மேலும், கோபக்கார திரைப்பட இயக்குநராக ஒரு சிறப்புத் தோற்றத்திலும் அவர் நடித்துள்ளார்.

முழுநீள நகைச்சுவைக் குடும்பத் திரைப்படமாக உருவாகியுள்ள இதில், பிரபல நகைச்சுவை நடிகர் யோகி பாபு 16 வித்தியாசமான வேடங்களில் நடித்து சாதனை படைத்துள்ளார்.

இத்திரைப்படம் தமிழ், தெலுங்கு, ஹிந்தி ஆகிய மொழிகளில் ஒரே நேரத்தில் பிரம்மாண்டமாக வெளியாகவுள்ளது.

அர்ஜுன் அசோகன், அஜு வர்க்கீஸ், ரெடின் கிங்ஸ்லி உள்ளிட்ட பலர் நடித்துள்ள இத்திரைப்படம், இசை, நடனம் மற்றும் நகைச்சுவை நிறைந்த ஒரு சிறப்பான கொண்டாட்டப் படமாக இருக்கும் என எதிர்பார்க்கப்படுகிறது.