நெய்மாரின் மாயாஜால ஆட்டம் இனி இல்லை! பிரேசில் புயல் ஓய்ந்தது!

உலகக் கால்பந்து ரசிகர்களுக்கு ஒரு உணர்ச்சிப்பூர்வமான செய்தி. பிரேசில் கால்பந்து அணியின் நட்சத்திர ஆட்டக்காரரும், அந்நாட்டின் வரலாற்றுச் சிறப்புமிக்க முன்னணி கோல் அடித்தவருமான நெய்மார் ஜூனியர், சர்வதேசக் கால்பந்து போட்டிகளில் இருந்து தனது முழுமையான ஓய்வை அதிகாரப்பூர்வமாக உறுதி செய்துள்ளார்.

2026 பிஃபா உலகக் கோப்பைத் தொடரின் சுற்றுகளுக்குப் பிறகு, பிரேசில் தேசிய அணிக்காக மீண்டும் விளையாடும் எண்ணம் தனக்கில்லை என்பதை 34 வயதான நெய்மார் வெளிப்படையாக அறிவித்துள்ளார்.

சமீபத்தில் அளித்த பேட்டியில் பேசிய அவர், 'பிரேசில் தேசிய அணியுடனான எனது காலம் முடிந்துவிட்டது என்று நினைக்கிறேன். அங்கு நான் பல வரலாற்றுச் சாதனைத் தருணங்களை உருவாக்கினேன். மஞ்சள் நிறச் சீருடைக்காக என் உயிரைக் கொடுத்து விளையாடினேன், ஆனால் இனி அதைத் தொடர விரும்பவில்லை' எனக் உணர்ச்சிவசப்பட்டுத் தெரிவித்துள்ளார்.

நெய்மாரின் பிரேசில் பயணச் சாதனைகளாக, பிரேசில் தேசிய அணிக்காக 130 போட்டிகளில் களமிறங்கி 80 கோல்களை அடித்து, பெலேவின் சாதனையை முறியடித்து முதலிடத்தில் உள்ளார்.

அத்தோடு 2013-ல் பிஃபா கன்ஃபெடரேஷன்ஸ் கோப்பை (FIFA Confederations Cup) மற்றும் 2016 ரியோ ஒலிம்பிக்கில் வரலாற்றுச் சிறப்புமிக்க தங்கப் பதக்கத்தை பிரேசிலுக்குப் பெற்றுத் தந்தார்.மேலும் 2014, 2018, 2022 மற்றும் 2026 என நான்கு உலகக் கோப்பைத் தொடர்களில் பிரேசிலுக்காக விளையாடியுள்ளார். 

தனது அசாத்தியமான லாவகமான ஆட்டத்தாலும் (Dribbling), மாயாஜால நகர்வுகளாலும் உலகெங்கிலும் உள்ள மில்லியன் கணக்கான ரசிகர்களைக் கவர்ந்த நெய்மாரின் சர்வதேசக் கால்பந்து பயணம் இத்துடன் நிறைவுக்கு வந்துள்ளது. பிரேசில் தேசிய அணியின் மஞ்சள் சீருடையில் இனி அவரைப் பார்க்க முடியாது என்றாலும், சாண்டோஸ் கிளப் அணியில் தனது ஆட்டத்தை அவர் தொடர்ந்து வருகிறார்.