மீண்டும் ஓடிடி என்ட்ரி... புதிய வெப் தொடரில் கமிட்டாகும் நடிகை திரிஷா!

தமிழ் சினிமாவில் பல ஆண்டுகளைக் கடந்தும் முன்னணி நாயகியாக வலம் வருபவர் நடிகை திரிஷா. லியோ, பொன்னியின் செல்வன் போன்ற படங்களின் மாபெரும் வெற்றிக்குப் பிறகு இவரின் மார்க்கெட் தற்போது உச்சத்தில் உள்ளது. இந்நிலையில், திரிஷா தற்போது மீண்டும் ஒரு புதிய வெப் தொடரில் நடிக்கவுள்ளதாகத் தகவல்கள் வெளியாகியுள்ளன.

ஏற்கனவே சோனி லிவ் ஓடிடி தளத்தில் வெளியான 'பிருந்தா' வெப் தொடர் மூலம் ஓடிடி உலகிலும் தனது முத்திரையைப் பதித்தார் திரிஷா. அந்தத் தொடருக்கு கிடைத்த வரவேற்பைத் தொடர்ந்து, தற்போது இயக்குநர் நந்தினி ரெட்டி இயக்கத்தில் உருவாகும் புதிய சூப்பர் நேச்சுரல் த்ரில்லர் வெப் தொடரில் நடிக்க அவர் ஒப்பந்தமாகியுள்ளதாகக் கூறப்படுகிறது.

முழுக்க முழுக்க நாயகியை மையப்படுத்திய கதைக்களமாக இந்த வெப் தொடர் உருவாகவுள்ளது. பிரபல ஓடிடி தளமான அமேசான் பிரைம் வீடியோ இந்தத் தொடரைத் தயாரிக்கவுள்ளதாகவும் தகவல்கள் தெரிவிக்கின்றன.

தொடர்ந்து தமிழ், தெலுங்கு எனப் பல மொழிப் படங்களில் பிஸியாக நடித்து வரும் திரிஷா, இந்த புதிய வெப் தொடர் குறித்த அதிகாரப்பூர்வ அறிவிப்பை விரைவில் வெளியிடுவார் என எதிர்பார்க்கப்படுகிறது. திரிஷாவின் இந்த லேட்டஸ்ட் ஓடிடி என்ட்ரி அவரது ரசிகர்களை மிகுந்த உற்சாகத்தில் ஆழ்த்தியுள்ளது.