அரசியல் வருகை பற்றி ரவி மோகனின் பேச்சு: "ஆர்வம் உள்ளவர்கள் வரலாம், தவறே இல்ல!"

தமிழ் சினிமாவில் முன்னணி நடிகராகத் வலம்வரும் ரவி மோகன், அண்மையில் நடைபெற்ற செய்தியாளர் சந்திப்பு ஒன்றில் பங்கேற்றார். அப்போது செய்தியாளர்கள் அவரிடம், தமிழ் சினிமாவில் பல முன்னணி நட்சத்திரங்கள் அரசியலுக்குள் நுழைந்து வரும் சூழலில், உங்களுக்கும் அரசியல் பிரவேசம் செய்யும் திட்டம் உள்ளதா? ரசிகர்கள் அழைத்தால் அரசியலுக்கு வருவீர்களா? எனத் தொடர்ச்சியாகக் கேள்வி எழுப்பினர்.

இந்தக் கேள்விகளுக்குப் புன்னகையுடன் பதிலளித்த நடிகர் ரவி மோகன் கூறியதாவது:

"நல்லது செய்ய வேண்டும்; அதை எங்கிருந்து வேண்டுமானாலும், எப்படி வேண்டுமானாலும் செய்யலாம். அதற்கு அரசியலுக்குள்தான் வர வேண்டும் என்பதில்லை; வராமலும் கூட செய்யலாம். ஆனால், அதுகுறித்த ஆர்வம் இருப்பவர்கள் அரசியலுக்கு வந்து கொண்டிருக்கிறார்கள். யாருக்கு அந்த ஆர்வம் வருகிறதோ, அவர்கள் அரசியலுக்கு வருவதில் தவறே கிடையாது. யார் வேண்டுமானாலும் அரசியலுக்கு வரலாம், எங்கிருந்து வேண்டுமானாலும் மக்களுக்கு நல்லவை செய்யலாம்" என்றார்.

தமிழகத்தில் நடிகர்கள் பலர் அரசியலில் களம் கண்டு வரும் சூழ்நிலையில், ரவி மோகனின் இந்த நாசூக்கான மற்றும் தெளிவான பதில் கோலிவுட் வட்டாரத்திலும் அரசியல் தளத்திலும் பெரும் கவனத்தைப் பெற்றுள்ளது. அவர் அரசியலுக்கு வருவதை முற்றிலுமாக மறுக்காமலும், அதே நேரத்தில் உறுதியளிக்காமலும் நடுநிலையான நிலைப்பாட்டை வெளிப்படுத்தியுள்ளதாக சினிமா விமர்சகர்கள் குறிப்பிடுகின்றனர்.

தற்போது பல படங்களில் பிஸியாக நடித்து வரும் ரவி மோகனின் இந்தப் பேட்டி சமூக வலைதளங்களில் பரவலாகப் பேசப்பட்டு வருகிறது.