SBB-யின் பயண அறிவுரைக்கு விமர்சனம்

நாள் முழுவதும் ரயில்களில் உள்ள இருக்கைகளில் சராசரியாக 70 சதவீதத்துக்கும் அதிகமானவை காலியாக இருப்பதாக SBB தெரிவித்துள்ளது.

அதேவேளை, காலை மற்றும் மாலை உச்ச நேரங்களில் சில ரயில்கள் முழுக் கொள்ளளவுடன் இயக்கப்படுவதால், அந்த நேரங்களில் இருக்கைகள் கிடைப்பது கடினமாக இருக்கலாம் என நிறுவனம் கூறுகிறது.

பயண நேரத்தில் நெகிழ்வுத்தன்மை உள்ளவர்கள், நெரிசல் குறைவான நேரங்களில் பயணம் செய்யலாம் என்றும், பயணத்தைத் திட்டமிடுவதற்கு முன் ரயில்களில் உள்ள கூட்ட நெரிசல் நிலவரத்தைச் சரிபார்க்கலாம் என்றும் SBB பரிந்துரைத்துள்ளது.

மேலும், 5 சுவிஸ் பிராங்குகள் செலுத்தி இருக்கையை முன்பதிவு செய்யும் வசதியும் பயணிகளுக்கு உள்ளது.

எனினும், இந்த அறிவுரை பயணிகளிடையே அதிருப்தியை ஏற்படுத்தியுள்ளது. ஒரு பயணி, வேலைக்குச் செல்ல வேண்டியவர்கள் தங்களது பயண நேரத்தை எவ்வாறு மாற்றிக்கொள்ள முடியும் என்று கேள்வி எழுப்பியுள்ளார்.

ஒரு வருடத்துக்கான ரயில் பயண அட்டைக்காக ஏற்கனவே 3,995 சுவிஸ் பிராங்குகள் செலுத்தும் நிலையில், கூடுதலாக இருக்கைக்கு கட்டணம் செலுத்துமாறு அறிவுறுத்துவது நியாயமற்றது என்றும் அவர் விமர்சித்துள்ளார்.

SBB செய்தித் தொடர்பாளர் Reto Schärli, இந்தப் பரிந்துரைகள் பயண நேரத்தை ஓரளவு மாற்றிக்கொள்ளக்கூடியவர்களை மட்டுமே கருத்தில் கொண்டு வழங்கப்பட்டவை என விளக்கமளித்துள்ளார்.

உச்ச நேரங்களில் இயக்கப்படும் ரயில்கள் ஏற்கனவே அதிகபட்ச கொள்ளளவுக்கு அருகில் இயங்குவதாகவும் அவர் தெரிவித்துள்ளார்.

இருப்பினும், பயணிகளின் எண்ணிக்கை தொடர்ந்து அதிகரித்து வருவதால், ரயில் சேவையின் கொள்ளளவை மேலும் அதிகரிக்க வேண்டிய தேவை இருப்பதை SBB ஏற்றுக்கொண்டுள்ளது.