சுவிஸ் பாராளுமன்ற இலையுதிர்கால கூட்டத்தொடர் தொடக்கம்: 'குடியேற்ற வரி' சட்டம் குறித்து தீவிர விவாதம்!

ஐரோப்பிய ஒன்றியத்தில் (EU) இருந்து சுவிட்சர்லாந்திற்குள் நுழையும் ஊழியர்களின் எண்ணிக்கையைக் கட்டுப்படுத்தவும், உள்நாட்டுப் பணியாளர்களுக்கு முன்னுரிமை அளிக்கவும் நிறுவனங்களுக்குக் 'குடியேற்ற வரி' விதிக்க வேண்டும் என்ற திட்டம் பாராளுமன்றத்தின் பரிசீலனையில் உள்ளது. 

வெளிநாடுகளில் இருந்து புதிய ஊழியர்களை வேலைக்கு அமர்த்தும் நிறுவனங்கள் ஒவ்வொரு ஊழியருக்கும் குறைந்தபட்சம் 4,000 சுவிஸ் ஃபிராங்க் (CHF) வரை குடியேற்றக் கட்டணமாகச் செலுத்த வேண்டும் என்ற முன்மொழிவு விவாதிக்கப்படுகிறது.

Family Reunification திட்டத்தின் கீழ் வரும் வயது வந்த உறுப்பினர்களுக்கும் குறிப்பிட்ட தொகை (சுமார் 2,000 CHF) வரியாக விதிக்கப்படலாம்.

இந்தக் கூடுதல் வரிச் சுமையின் மூலம் நிறுவனங்கள் வெளிநாட்டு ஆட்களைத் தேடுவதைத் தவிர்த்து, சுவிட்சர்லாந்திலேயே உள்ள உள்ளூர் வேலை தேடுபவர்களுக்கு அதிக வாய்ப்புகளை வழங்கும் எனக் கருதப்படுகிறது. 

வலதுசாரி மற்றும் சில ஆளும் கட்சி உறுப்பினர்கள் இந்த மசோதாவிற்கு ஆதரவு தெரிவித்து வரும் வேளையில், தொழிலதிபர் அமைப்புகளும் வணிகச் சமூகத்தினரும் "இது திறமையான ஊழியர்களின் வருகையைத் தடுத்து, சுவிஸ் பொருளாதாரத்தைப் பாதிக்கும்" எனக் கடும் எதிர்ப்பு தெரிவித்து வருகின்றனர்.  

மேலும், ஐரோப்பிய ஒன்றியத்துடனான இருதரப்பு ஒப்பந்தங்களுக்கு இந்த வரிச்சட்டம் எந்த அளவுக்கு இணக்கமாக இருக்கும் என்பது குறித்தும் பாராளுமன்றத்தில் தீவிர விவாதங்கள் நடைபெறவுள்ளன. 

இந்தக் கூட்டத்தொடரின் முடிவில் சுவிட்சர்லாந்தின் குடியேற்றக் கொள்கையில் முக்கிய மாற்றங்கள் வரக்கூடும் என எதிர்பார்க்கப்படுகிறது.