சுவிட்சர்லாந்தின் புதிய வாக்கெடுப்பு: கண்டிப்பான நடுநிலைமைக்கு மாறுமா?

சுவிட்சர்லாந்து நாட்டின் பல நூற்றாண்டுகால வரலாற்றுச் சிறப்புமிக்க "நடுநிலைமைக் கொள்கை" தொடர்பான ஒரு முக்கிய முடிவை எடுப்பதற்காக, அடுத்த மாதம் நாடு தழுவிய பிரம்மாண்ட தேசிய வாக்கெடுப்பு நடைபெறவுள்ளது. சர்வதேச அளவில் போர் பதற்றங்களும் அரசியல் அழுத்தங்களும் அதிகரித்து வரும் சூழலில், இந்த வாக்கெடுப்பு உலக நாடுகளின் கவனத்தை ஈர்த்துள்ளது.

சுவிஸ் கூட்டாட்சி அரசியலமைப்பில் நடுநிலைமைக் கொள்கையை மிகவும் கடுமையான முறையில் வரைமுறைப்படுத்த வலியுறுத்தி இந்த வாக்கெடுப்பு முன்னெடுக்கப்படுகிறது. இதன் மூலம் வெளிநாட்டுப் போர்கள் மற்றும் சர்வதேச விவகாரங்களில் சுவிட்சர்லாந்து முழுமையான நடுநிலை வகிப்பதை சட்டப்பூர்வமாக உறுதி செய்ய திட்டமிடப்பட்டுள்ளது.

இந்தக் "கடுமையான நடுநிலைமை" முன்மொழிவு நிறைவேற்றப்பட்டால், சுவிட்சர்லாந்து அரசு பின்வரும் முக்கியக் கட்டுப்பாடுகளுக்குக் கட்டுப்பட வேண்டியிருக்கும் அதாவது,

நேட்டோ மற்றும் இராணுவக் கூட்டணிகளுக்குத் தடை: சுவிட்சர்லாந்து மீது நேரடியாகப் படைஎடுப்பு அல்லது தாக்குதல் நடத்தப்பட்டால் மட்டுமே ஒழிய, NATO உள்ளிட்ட எந்தவொரு சர்வதேச இராணுவ அமைப்புடனும் சுவிட்சர்லாந்து இணையவோ அல்லது கூட்டுப் பயிற்சிகளில் ஈடுபடவோ கூடாது.

பொருளாதாரத் தடைகளில் பங்கேற்கத் தடை: 

ஐக்கிய நாடுகள் சபையின் (UN) பாதுகாப்புச் சபை பிறப்பிக்கும் சர்வதேசத் தடைகளைத் தவிர்த்து, பிற நாடுகள் அல்லது ஐரோப்பிய ஒன்றியம் போன்ற அமைப்புகள் தனிப்பட்ட முறையில் பிறப்பிக்கும் பொருளாதாரத் தடைகளில் சுவிட்சர்லாந்து பங்கேற்க முற்றிலுமாகத் தடை விதிக்கப்படும்.

அதேவேளையில், சுவிஸ் கூட்டாட்சி அரசாங்கம் மற்றும் நாடாளுமன்றத்தின் பெரும்பான்மை உறுப்பினர்கள் இந்த முன்மொழிவுக்குக் கடும் எதிர்ப்பு தெரிவித்து வருகின்றனர். இத்தகைய கடுமையான கட்டுப்பாடுகள் சுவிட்சர்லாந்தின் சர்வதேச உறவுகளையும், பொருளாதார இராஜதந்திரத்தையும் பாதிக்கும் என அவர்கள் எச்சரிக்கின்றனர்.

இருப்பினும், சுவிட்சர்லாந்தின் நேரடி ஜனநாயக நடைமுறையின்படி, நாட்டின் இறுதி அதிகாரத்தை மக்கள் கொண்டுள்ளதால், அடுத்த மாதம் நடைபெறவுள்ள வாக்கெடுப்பில் சுவிஸ் மக்கள் அளிக்கும் தீர்ப்பே இக்கொள்கையின் எதிர்காலத்தை நிர்ணயிக்கும்.