காசா போர் ஆவணப்படத்துடன் ஆஸ்கார் போட்டியில் சுவிட்சர்லாந்து!

ஆஸ்கார் விருது விழாவின் சிறந்த சர்வதேச திரைப்படப் பிரிவுக்காக, சுவிட்சர்லாந்து சார்பில் "Who Is Still Alive" (இன்னும் உயிரோடு இருப்பவர் யார்?) என்ற ஆவணப்படம் பரிந்துரைக்கப்பட்டுள்ளது. 

ஜெனீவாவைச் சேர்ந்த பிரபல இயக்குநர் நிகோலஸ் வாடிமோஃப் (Nicolas Wadimoff) இயக்கியுள்ள இந்தப் படம், காசா பகுதியில் போரின் கொடூரங்களில் இருந்து தப்பிய பாலஸ்தீன மக்களின் வலி நிறைந்த அனுபவங்களையும், அவர்களின் வாழ்க்கைப் போராட்டங்களையும் பதிவு செய்துள்ளது. 

காசாவில் வீடு, உறவுகள் மற்றும் தங்களின் பூர்வீகத்தை இழந்த ஒன்பது பாலஸ்தீனர்கள், ஒரு மேடையில் சாக்-தூள் கோடுகளால் தங்கள் பகுதிகளை வரைந்து, போருக்கு முன்னும் பின்னும் தங்கள் வாழ்க்கையில் நடந்த மாற்றங்களைப் பகிர்ந்து கொள்வது போல் இந்த ஆவணப்படம் மிக நேர்த்தியாகப் படமாக்கப்பட்டுள்ளது. 

சுவிட்சர்லாந்தின் கலாச்சார அமைச்சகம் வெளியிட்டுள்ள அறிக்கையில், "இழப்பு, அகதிகளாக மாற்றப்படுதல் மற்றும் தாய்நிலத்தின் மீதான பிடிப்பு ஆகிய உணர்வுகளை இந்த ஆவணப்படம் மிக ஆழமாகப் பேசுகிறது" என்று புகழாரம் சூட்டியுள்ளது. 

ஏற்கனவே 'சோலோதர்ன் திரைப்பட விழாவில்' (Solothurn Film Festival) நாட்டின் உயரிய விருதான 'பிரிக்ஸ் டி சோலூரே' (Prix de Soleure) விருதை வென்ற இந்தப் படம், தற்போது சர்வதேச அளவில் ஆஸ்கார் பந்தயத்திலும் களம் இறங்கியுள்ளமை குறிப்பிடத்தக்கது .