உலகளவில் ரூ. 200 கோடி வசூல்: திரையரங்குகளை ஆக்கிரமிக்கும் ‘விஸ்வநாத் அண்ட் சன்ஸ்’!

நடிகர் சூர்யா நடிப்பில் சமீபத்தில் திரையரங்குகளில் வெளியான 'விஸ்வநாத் அண்ட் சன்ஸ்' திரைப்படம், உலகளவில் பாக்ஸ் ஆபிஸில் வசூல் மழை பொழிந்து புதிய சாதனைகளைப் படைத்து வருகிறது.

வெங்கி அட்லூரி இயக்கத்தில், சூர்யா மற்றும் மமிதா பைஜூ முதன்மை கதாபாத்திரங்களில் நடித்து வெளியான திரைப்படம் 'விஸ்வநாத் அண்ட் சன்ஸ்'. குடும்பங்கள் கொண்டாடும் காதல் மற்றும் உணர்வுப்பூர்வமான திரைப்படமாக உருவாக்கப்பட்டுள்ள இந்தத் திரைப்படம், வெளியானது முதல் ரசிகர்களிடையே பெரும் வரவேற்பைப் பெற்று வருகிறது.

ஜி.வி. பிரகாஷ் குமாரின் இசையில் வெளியான பாடல்கள் ஏற்கனவே சூப்பர் ஹிட் அடித்த நிலையில், தற்போது திரையரங்குகளில் படம் அரங்கு நிறைந்த காட்சிகளாக ஓடிக்கொண்டிருக்கிறது. குடும்ப பின்னணி, மனதைத் தொடும் உணர்ச்சிகரமான காட்சிகள் மற்றும் சூர்யாவின் சிறப்பான நடிப்பு ஆகியவை அனைத்துத் தரப்பு ரசிகர்களையும் வெகுவாகக் கவர்ந்துள்ளன.

குறுகிய நாட்களிலேயே உலகளவில் ரூ. 200 கோடியை தாண்டி வசூல் சாதனை படைத்துள்ளதுடன், சூர்யாவின் திரைப்பயணத்தில் மிக வேகமாக 100 கோடி ரூபாயைக் கடந்த திரைப்படமாகவும் இது உருவெடுத்துள்ளது.

தமிழ்நாடு மட்டுமின்றி, தெலுங்கு மாநிலங்கள் மற்றும் வெளிநாடுகளிலும் படத்தின் வசூல் ஈர்ப்பு புதிய உச்சத்தைத் தொட்டுள்ளது.

திரையரங்க உரிமையாளர்களுக்கும் விநியோகஸ்தர்களுக்கும் பெரும் லாபத்தைக் கொடுத்துள்ள 'விஸ்வநாத் அண்ட் சன்ஸ்', இந்த ஆண்டின் மிகப்பெரிய பிளாக்பஸ்டர் திரைப்படங்களில் ஒன்றாக இடம் பிடித்துள்ளது.

குடும்பங்களின் ஆதரவோடு தொடர்ந்து வெற்றிகரமாக இயங்கி வரும் 'விஸ்வநாத் அண்ட் சன்ஸ்', மேலும் பல வசூல் சாதனைகளைப் படைக்கும் என எதிர்பார்க்கப்படுகிறது.