சென்னையில் 2-ம் கட்ட மின்சார பஸ் சேவை: நாளை தொடங்கி வைக்கிறார் முதலமைச்சர்

சென்னையில் பொதுப்போக்குவரத்தை மேம்படுத்தும் வகையில், 2-ம் கட்ட மின்சார பேருந்துகள் இயக்கத்தை முதலமைச்சர் விஜய் நாளை (செவ்வாய்க்கிழமை) அதிகாரப்பூர்வமாக தொடங்கி வைக்கிறார்.

சுற்றுச்சூழல் மாசுபாட்டை குறைக்கவும், பொதுமக்களின் பயணத்தை நவீனப்படுத்தவும் சென்னை பெருநகர போக்குவரத்துக் கழகம் சார்பில் மின்சார பேருந்துகள் பயன்பாட்டிற்கு கொண்டு வரப்பட்டு வருகின்றன. 

முதற்கட்டமாக அறிமுகப்படுத்தப்பட்ட மின்சார பேருந்துகளுக்கு மக்களிடையே நல்ல வரவேற்பு கிடைத்ததை தொடர்ந்து, தற்போது 2-ம் கட்டமாக 750 புதிய தாழ்தள குளிர்சாதன (AC) மின்சார பேருந்துகள் இயக்கப்படவுள்ளன.

நாளை காலை சென்னை தலைமைச் செயலக வளாகத்தில் நடைபெறும் விழாவில், முதலமைச்சர் கொடியசைத்து இந்தப் புதிய பேருந்து சேவைகளை மக்கள் பயன்பாட்டிற்கு அர்ப்பணிக்கிறார்.

இந்தப் புதிய மின்சார பேருந்துகள் ஆலந்தூர், சென்ட்ரல், பெரம்பூர், ஆவடி, கே.கே. நகர் உள்ளிட்ட 7 முக்கிய பணிமனைகளில் இருந்து இயக்கப்பட திட்டமிடப்பட்டுள்ளது.

முதற்கட்டமாக ஆலந்தூர் பணிமனையில் இருந்து 130 ஏசி மின்சார பேருந்துகள் உடனடியாக தடங்களில் இயக்கப்பட உள்ளன. நவீன வசதிகள் மற்றும் மாற்றுத்திறனாளிகள் ஏறி இறங்க ஏதுவான தாழ்தள வசதியுடன் கூடிய இந்தப் பேருந்துகளின் வருகை, சென்னைவாசிகளின் பயண அனுபவத்தை மேலும் சொகுசாக்கும் என எதிர்பார்க்கப்படுகிறது.