இலங்கையிலிருந்து சென்னை திரும்பிய 55 வயது பயணி திடீர் மரணம்

இலங்கைக்கு சுற்றுலா சென்று சென்னை திரும்பிய 55 வயதுடைய நபர் ஒருவர், சென்னை விமான நிலைய மெட்ரோ ரயில் நிலையப் பகுதியில் திடீரென மயங்கி விழுந்து உயிரிழந்த சம்பவம் பதிவாகியுள்ளது.

சென்னை பிராட்வே பகுதியைச் சேர்ந்த சையத் சிராஜுதீன் என்பவர் சுற்றுலா விசாவில் இலங்கைக்கு சென்றிருந்த நிலையில், தனது பயணத்தை முடித்துக்கொண்டு ஸ்ரீலங்கன் எயார்லைன்ஸ் விமானம் மூலம் சென்னை திரும்பியுள்ளார்.

விமான நிலையத்தில் குடிவரவு மற்றும் சுங்க சோதனைகளை முடித்த பின்னர், வீட்டிற்குச் செல்வதற்காக விமான நிலைய வளாகத்தில் உள்ள மெட்ரோ ரயில் நிலையத்தை நோக்கிச் சென்றுள்ளார்.

மெட்ரோ ரயில் நிலையத்தின் டிக்கெட் கவுண்டர் அருகே சென்றுகொண்டிருந்தபோது அவர் திடீரென மயங்கி கீழே விழுந்ததாக தெரிவிக்கப்படுகிறது.

இதனை அவதானித்த பயணிகள் மற்றும் மெட்ரோ நிலைய ஊழியர்கள் உடனடியாக விமான நிலைய மருத்துவக் குழுவினருக்கு தகவல் வழங்கியுள்ளனர். விரைந்து வந்த மருத்துவக் குழுவினர் முதலுதவி வழங்கியபோதும், அவரை காப்பாற்ற முடியவில்லை என கூறப்படுகிறது.

இதையடுத்து சம்பவ இடத்திற்கு சென்ற விமான நிலைய பொலிஸார் சடலத்தை மீட்டு, பிரேத பரிசோதனைக்காக தாம்பரம் அரசு மருத்துவமனைக்கு அனுப்பி வைத்துள்ளனர்.

இந்த திடீர் மரணம் தொடர்பாக வழக்குப் பதிவு செய்யப்பட்டுள்ளதுடன், மரணத்திற்கான காரணத்தை கண்டறிய மேலதிக விசாரணைகள் முன்னெடுக்கப்பட்டு வருகின்றன.