ரஷ்யாவிற்கு உளவு பார்த்த உக்ரைன் நாட்டவருக்கு ஜெர்மனி நீதிமன்றம் சிறைத்தண்டனை!

ரஷ்ய அரசிற்காகச் உளவு பார்த்தல் மற்றும் நாசவேலைகளில் ஈடுபடத் திட்டமிட்ட குற்றத்திற்காக, 30 வயதான உக்ரைன் நாட்டவருக்கு ஜெர்மனியின் ஸ்டட்கார்ட் உயர் மாநில நீதிமன்றம் ஒரு வருடமும் 3 மாதங்களும் சிறைத்தண்டனை விதித்துள்ளது.

 கடந்த ஆண்டு சுவிட்சர்லாந்தின் தூர்காவ் பகுதியில் வைத்துக் கைது செய்யப்பட்ட இந்த நபர், பின்னர் விசாரணைக்காக ஜெர்மனிக்கு நாடுகடத்தப்பட்டார். ரஷ்ய உளவு அமைப்பின் உத்தரவின் பேரில், ஜி.பி.எஸ் (GPS) கண்காணிப்புக் கருவிகள் அடங்கிய பார்சல்களை அஞ்சல் சேவைகள் மூலம் அனுப்பி, போக்குவரத்து பாதைகளைக் கண்காணித்து நாசவேலைகளுக்குத் திட்டமிட்டதாக இவர் மீது குற்றம் சாட்டப்பட்டது. 

இந்த வழக்கில் தொடர்புடைய மேலும் இரு உக்ரைனியர்கள் போதிய ஆதாரங்கள் இல்லாததால் விடுவிக்கப்பட்ட நிலையில், தண்டனை பெற்ற நபர் ஏற்கனவே விசாரணைக்காலக் காவலில் தனது சிறைக்காலத்தை நிறைவு செய்துவிட்டதால் தற்போது விடுவிக்கப்பட்டுள்ளார்.