சுவிட்சர்லாந்தில் கருங்குருவிகளில் பரவும் புதிய வைரஸ்

குறிப்பாக Graubünden மாகாணத்தில், இறந்த மற்றும் சோர்வாக காணப்படும் கருங்குருவிகள் தொடர்பாக அதிகளவிலான தகவல்கள் கிடைத்துள்ளன. Chur உள்ளிட்ட பகுதிகளில் இதுபோன்ற சம்பவங்கள் குழுவாக பதிவாகியுள்ளன.

இறகு உதிர்தல், சோர்வு மற்றும் செயலற்ற தன்மை போன்ற அறிகுறிகள் தென்பட்ட பறவைகளை பரிசோதித்ததில், Usutu வைரஸ் தொற்று இருப்பது உறுதி செய்யப்பட்டதாக Bern பல்கலைக்கழகத்தைச் சேர்ந்த ஆய்வாளர்கள் தெரிவித்துள்ளனர்.

கடந்த இரண்டு வாரங்களில் Switzerland-ன் ஐந்து மாகாணங்களில் இருந்து பரிசோதிக்கப்பட்ட ஐந்து கருங்குருவிகளிலும் இந்தத் தொற்று உறுதி செய்யப்பட்டுள்ளதாக தெரிவிக்கப்பட்டுள்ளது. கருங்குருவிகள் இந்த வைரஸால் அதிகம் பாதிக்கப்பட்டாலும், பாடும் பறவைகள் மற்றும் ஆந்தைகளுக்கும் தொற்று ஏற்பட வாய்ப்புள்ளதாக அதிகாரிகள் தெரிவித்துள்ளனர்.

Africa-வை பூர்வீகமாகக் கொண்ட Usutu வைரஸ், கொசுக்கள் மூலம் பரவுகிறது. பொதுவாக மே முதல் செப்டம்பர் வரையிலான காலகட்டத்தில் இதன் பாதிப்பு அதிகமாக காணப்படுகிறது. அதிக வெப்பநிலையும் வைரஸ் பரவலுக்கு சாதகமாக இருக்கலாம் என நிபுணர்கள் கூறுகின்றனர். நோய்வாய்ப்பட்ட அல்லது இறந்த பறவைகளை கையால் தொடக்கூடாது என்றும், அவற்றை கையாள வேண்டியிருந்தால் கையுறைகளை பயன்படுத்த வேண்டும் என்றும் அறிவுறுத்தப்பட்டுள்ளது.

சோர்வாக காணப்படும் கருங்குருவி 24 மணி நேரத்திற்கும் மேலாக அதே இடத்தில் இருந்தால், அருகிலுள்ள வனவிலங்கு மீட்பு மையம் அல்லது வனத்துறை அதிகாரிகளை தொடர்புகொள்ளுமாறு அறிவுறுத்தப்பட்டுள்ளது. இந்த வைரஸ் மனிதர்களுக்கு மிகக் குறைந்த ஆபத்தையே ஏற்படுத்துவதாகவும், பெரும்பாலான சந்தர்ப்பங்களில் அறிகுறிகள் இல்லாமலோ அல்லது லேசான அறிகுறிகளுடனோ மட்டுமே பாதிப்பு ஏற்படுவதாகவும் தெரிவிக்கப்பட்டுள்ளது.