சென்னையில் வேகமாக பரவும் வைரஸ் காய்ச்சல்

காய்ச்சலுடன் தலைவலி, தொண்டை கரகரப்பு, இருமல், சளி மற்றும் தொடர் தும்மல் போன்ற அறிகுறிகள் ஏற்படுவதாக கூறப்படுகிறது. சிலருக்கு வாய் கசப்பு மற்றும் பசியின்மை காரணமாக உணவு சாப்பிடுவதிலும் சிரமம் ஏற்படுவதாக தெரிவிக்கப்பட்டுள்ளது.

இந்த காய்ச்சல் சுமார் 5 நாட்கள் வரை நீடிக்கலாம் என மருத்துவர்கள் கூறியுள்ளனர். குறிப்பாக நோய் எதிர்ப்பு சக்தி குறைவாக இருப்பவர்களுக்கு தொற்று எளிதில் பரவும் வாய்ப்பு இருப்பதாகவும் எச்சரிக்கப்பட்டுள்ளது.

தமிழ்நாட்டில் எச்1என்1 வகை பன்றிக்காய்ச்சல் பாதிப்பும் அதிகரித்து வருவதால், காய்ச்சல், சளி, இருமல் போன்ற அறிகுறிகள் இருந்தால் சுயமாக மருந்துகளை எடுத்துக்கொள்ளாமல் மருத்துவரை அணுகி பரிசோதனை செய்து கொள்ளுமாறு சுகாதாரத்துறை அறிவுறுத்தியுள்ளது.

காய்ச்சல் பாதித்தவர்கள் முகக்கவசம் அணிவதுடன், மற்றவர்களிடம் இருந்து தேவையான இடைவெளியை கடைப்பிடிப்பதும், மருத்துவர்களின் ஆலோசனையைப் பின்பற்றுவதும் அவசியம் என அறிவுறுத்தப்பட்டுள்ளது.