சுவிட்சர்லாந்தில் விபத்து - பெண் பலி!

தென்கிழக்கு சுவிட்சர்லாந்தில் சுற்றுலாப் பயணிகள் சென்ற குதிரை வண்டி விபத்துக்குள்ளானதில், 73 வயது மூதாட்டி ஒருவர் உயிரிழந்தார்; மேலும் 12 பேர் காயமடைந்தனர்.

சுவிட்சர்லாந்தின் பான்ட்ரெசினா (Pontresina) அருகே உள்ள வால் ரோசெக் (Val Roseg) என்ற மலைப் பள்ளத்தாக்கில் இந்த கோர விபத்து நிகழ்ந்துள்ளது. சுற்றுலாப் பயணிகளை ஏற்றிக்கொண்டு மலைப்பகுதியில் கீழ்நோக்கிச் சென்றுகொண்டிருந்த குதிரை வண்டியின் பிரேக் திடீரென பழுதடைந்துள்ளது.

இதனை உணர்ந்த ஓட்டுநர் வண்டியை நிறுத்த தீவிரமாக முயன்றுள்ளார். அப்போது வண்டியில் பூட்டப்பட்டிருந்த மூன்று குதிரைகளில் ஒன்று நிலைதடுமாறி கீழே விழுந்ததால், கட்டுப்பாட்டை இழந்த வண்டி அருகில் இருந்த மரத்தின் மீது பலமாக மோதியது. இதில், வண்டியில் இருந்த பயணிகள் தூக்கி வீசப்பட்டனர். இந்த விபத்தில் 73 வயதுடைய ஸ்விஸ் நாட்டைச் சேர்ந்த பெண்மணி சம்பவ இடத்திலேயே உயிரிழந்ததாக காவல்துறையினர் தெரிவித்துள்ளனர்.

தகவலறிந்து சம்பவ இடத்திற்கு 4 ஆம்புலன்ஸ்கள் மற்றும் 3 மீட்பு ஹெலிகாப்டர்கள் விரைந்து சென்று மீட்புப் பணிகளில் ஈடுபட்டன. காயமடைந்தவர்கள் உடனடியாக உள்ளூர் மருத்துவமனைகளில் அனுமதிக்கப்பட்டுள்ளனர். அவர்களில் இருவரின் நிலைமை கவலைக்கிடமாக உள்ளதாக மருத்துவ வட்டாரங்கள் தெரிவிக்கின்றன.

இந்த விபத்து குறித்தும், வண்டியில் ஏற்பட்ட இயந்திரக் கோளாறு குறித்தும் உள்ளூர் காவல்துறையினர் தீவிர விசாரணை மேற்கொண்டு வருகின்றனர்.