சட்டப்பேரவையில் 110 விதியின் கீழ் அதிரடி அறிவிப்புகள்: முதலமைச்சர் விஜய் வெளியிட்ட முக்கிய திட்டங்கள்!

தமிழ்நாடு சட்டப்பேரவை கூட்டத்தொடரில் இன்று, விதி 110-ன் கீழ் முதலமைச்சர் விஜய் பல்வேறு முக்கிய மற்றும் புதிய தொலைநோக்குத் திட்டங்கள் குறித்த அதிரடி அறிவிப்புகளை வெளியிட்டார்.

மின்கட்டமைப்பு மேம்பாடு: மாநிலத்தில் ரூ.33,066 கோடி மதிப்பீட்டில் புதிய மின் தொடரமைப்பு மற்றும் கட்டமைப்பு மேம்பாட்டுத் திட்டங்கள் செயல்படுத்தப்படும். இதன் மூலம் 196 புதிய துணை மின் நிலையங்களும், 15,000 கி.மீ நீளமுடைய புதிய மின் பாதைகளும் அமைக்கப்படும்.

தொழில்துறை வளர்ச்சி: காஞ்சிபுரம் மதுரமங்கலத்தில் ரூ.175 கோடியில் புதிய Semiconductor பூங்கா, கோவையில் ரூ.400 கோடியில் டிஜிட்டல் நிதி மையம் மற்றும் திருச்சி மண்டலத்தில் பல்முனை சரக்கு போக்குவரத்து மையம் அமைக்கப்படும்.

மருத்துவக் காப்பீடு உயர்வு: முதலமைச்சரின் விரிவான மருத்துவக் காப்பீட்டுத் திட்டத்தின் கீழ் அளிக்கப்படும் இலவச சிகிச்சைக்கான காப்பீட்டுத் தொகை, ஆண்டொன்றுக்கு ரூ.5 லட்சத்தில் இருந்து ரூ.25 லட்சமாக கணிசமாக உயர்த்தப்படுகிறது.

வடசென்னைக்கு பன்னோக்கு மருத்துவமனை: வடசென்னை பகுதி மக்களின் வசதிக்காக, பெரம்பூரில் ரூ.300 கோடி மதிப்பீட்டில் 400 படுக்கைகள் கொண்ட பன்னோக்கு உயர் சிறப்பு மருத்துவமனை உருவாக்கப்படும்.

பால் உற்பத்தியாளர்களுக்கு நற்செய்தி: ஆவின் கூட்டுறவு சங்கங்களுக்கு பால் வழங்கும் விவசாயிகளுக்கு பயன்படும் வகையில், பால் கொள்முதல் விலை லிட்டருக்கு ரூ.1 உயர்த்தப்படுவதோடு, அரசு வழங்கும் ஊக்கத்தொகையும் ரூ.5 ஆக உயர்த்தப்படுகிறது.

சட்டப்பேரவையில் முதலமைச்சர் விஜய் வெளியிட்ட இந்த மக்கள் நலச் சலுகைகள் மற்றும் புதிய உட்கட்டமைப்பு திட்ட அறிவிப்புகளுக்குப் பல்வேறு தரப்பினரும் தங்களது வரவேற்பைத் தெரிவித்து வருகின்றனர்.