ரஷிய எண்ணெய் வாங்கும் நாடுகளுக்கு கூடுதல் வரி

‘லிண்ட்சி ஓ. கிரஹாம் ரஷியா மற்றும் ஈரான் தடைகள் சட்டம்’ எனப்படும் இந்த சட்டம், ரஷியாவுக்கு எதிரான பொருளாதார அழுத்தத்தை அதிகரிக்கும் வகையில் கொண்டுவரப்பட்டுள்ளது. ரஷியாவின் எரிசக்தி மற்றும் பாதுகாப்புத் துறைகள், ரஷியாவுடன் தொடர்புடைய நிறுவனங்கள் மற்றும் தடைகளைத் தவிர்க்க பயன்படுத்தப்படும் எண்ணெய் கப்பல்கள் மீதும் நடவடிக்கை எடுக்க இந்த சட்டம் வழிவகுக்கிறது.

குறிப்பாக, ரஷிய எண்ணெய் மற்றும் எரிவாயுவை அதிக அளவில் வாங்கும் நாடுகளின் அமெரிக்காவுக்கான பொருட்களுக்கு அதிகபட்சமாக 100 சதவீதம் வரை கூடுதல் வரி விதிக்க டிரம்புக்கு அதிகாரம் வழங்கப்பட்டுள்ளது. இந்தியா மற்றும் சீனா உள்ளிட்ட நாடுகள் இந்த நடவடிக்கையால் பாதிக்கப்படக்கூடிய நாடுகளாக குறிப்பிடப்படுகின்றன.

எனினும், இந்தியா மீது 100 சதவீத வரி உடனடியாக அமல்படுத்தப்படவில்லை. அந்த வரியை விதிப்பதற்கான சட்ட அதிகாரமே தற்போது வழங்கப்பட்டுள்ளது. இந்தியா, தனது எரிசக்தி பாதுகாப்பு மற்றும் வர்த்தக நலன்களை பாதுகாக்க தேவையான நடவடிக்கைகளை எடுப்பதாக ஏற்கனவே தெரிவித்துள்ளது.

இந்த புதிய சட்டம் அமெரிக்கா–இந்தியா வர்த்தக உறவுகளிலும், உலகளாவிய எண்ணெய் சந்தையிலும் தாக்கத்தை ஏற்படுத்தக்கூடும் என எதிர்பார்க்கப்படுகிறது.