ஹார்முஸ் ஜலசந்தியில் எண்ணெய்க் கப்பல்கள் மீது தாக்குதல் – 29 இந்திய மாலுமிகளுக்கு அச்சுறுத்தல்!

அக்டோபர் 29ஆம் தேதி, சைப்ரஸ் நாட்டுக் கொடியுடன் பயணித்த MT ARZANA கப்பல் மீது ஏவுகணை போன்ற வெடிபொருள் மூலம் தாக்குதல் நடத்தப்பட்டது. இதில் இரண்டு இந்திய மாலுமிகள் இருந்தனர்.

அடுத்த நாள், பனாமா நாட்டுக் கொடியுடன் 27 இந்திய மாலுமிகளை ஏற்றிச் சென்ற MT LOUIS 1 கப்பலின் அடிப்பகுதியில் காந்த வெடிகுண்டு மூலம் தாக்குதல் நடத்தப்பட்டது. இதனால் எஞ்சின் அறையில் தீப்பற்றியதுடன், கப்பலின் இயக்கமும் தற்காலிகமாகப் பாதிக்கப்பட்டது. பின்னர் தீ அணைக்கப்பட்டு கப்பல் மீண்டும் பயணத்தைத் தொடர்ந்தது.

இரண்டு சம்பவங்களிலும் இருந்த 29 இந்திய மாலுமிகளுக்கும் பெரிய பாதிப்பு ஏற்படவில்லை எனத் தெரிவிக்கப்பட்டுள்ளது. இருப்பினும், கடல் பகுதியில் தொடரும் பாதுகாப்பு அச்சுறுத்தல்கள் குறித்து கவலை தெரிவித்துள்ள மாலுமிகள், இந்திய அரசு நிரந்தரத் தீர்வு காண வேண்டும் எனக் கோரிக்கை விடுத்துள்ளனர்.