கல்வி நிலையங்களில் முகத்தை மூட தடை! இத்தாலியில் புதிய சட்டத்தைக் கொண்டுவர பிரதமர் மெலோனி முடிவு!

நாட்டின் பாதுகாப்பு, பெண்களின் உரிமைகள் மற்றும் பாலின சமத்துவத்தைப் பேணுவதற்காகவே இந்த நடவடிக்கை பரிசீலிக்கப்பட்டு வருவதாக இத்தாலிய அரசு வட்டாரங்கள் தெரிவிக்கின்றன.

பொது இடங்கள் மற்றும் கல்வி நிறுவனங்களில் ஒருவரின் அடையாளத்தை உறுதிப்படுத்துவது பாதுகாப்பிற்கு அவசியமானது என்பதால், முகத்தை மறைக்கும் ஆடைகளுக்குத் தடை விதிக்க முடிவு செய்யப்பட்டுள்ளது.

பர்தா அணிவது பெண்களின் சுதந்திரத்தைக் கட்டுப்படுத்தும் ஒரு கலாச்சாரக் குறியீடாகப் பார்க்கப்படுவதாகவும், கல்வி பயிலும் இடங்களில் அனைவரும் சமமாக நடத்தப்பட வேண்டும் என்றும் மெலோனியின் வலதுசாரி அரசு வாதிடுகிறது.

இந்தத் தடையை மீறி முகத்தை மறைக்கும் ஆடைகளை அணியும் நபர்களுக்கும், அதை அணியுமாறு பிறரை வற்புறுத்துபவர்களுக்கும் கடுமையான அபராதம் விதிக்க புதிய சட்ட முன்வடிவில் வழிவகை செய்யப்பட்டுள்ளதாகத் தெரிகிறது.

இத்தாலி அரசின் இந்தத் திட்டத்திற்கு அந்நாட்டின் முஸ்லிம் அமைப்புகளும், மனித உரிமைக் குழுக்களும் கடும் எதிர்ப்புத் தெரிவித்துள்ளன. இத்தகைய தடை தனிமனித சுதந்திரத்திற்கும், மத உரிமைக்கும் எதிரானது என்றும், இது குறிப்பிட்ட சமூகத்தைச் சேர்ந்த மாணவர்களைக் கல்வி நிலையங்களில் தனிமைப்படுத்தும் என்றும் அவர்கள் குற்றம் சாட்டுகின்றனர்.

ஏற்கனவே பிரான்ஸ், பெல்ஜியம் போன்ற ஐரோப்பிய நாடுகளில் பர்தாவுக்குப் பல்வேறு கட்டுப்பாடுகள் நடைமுறையில் உள்ள நிலையில், தற்போது இத்தாலியிலும் இந்த விவாதம் தீவிரமடைந்துள்ளது.