ரஷ்யா மீதான தடை: சுவிட்சர்லாந்தில் செப்டம்பரில் பொது வாக்கெடுப்பு

சுவிட்சர்லாந்தின் பாரம்பரிய நடுநிலைமைக் கொள்கை மற்றும் உக்ரைன் போரைத் தொடர்ந்து ரஷ்யா மீது விதிக்கப்பட்ட பொருளாதாரத் தடைகள் குறித்து, சுவிஸ் மக்களிடையே நேரடி ஜனநாயக முறையில் இறுதி முடிவெடுப்பதற்கான வரலாற்று முக்கியத்துவம் வாய்ந்த பொது வாக்கெடுப்பு வரும் செப்டம்பர் 27 ஆம் தேதி நடைபெறவுள்ளது. இந்த வாக்கெடுப்பிற்கான பிரசாரக் களத்தில் இதுவரை பல மில்லியன் சுவிஸ் பிராங்குகள் செலவிடப்பட்டுள்ளதாகத் தகவல்கள் வெளியாகியுள்ளன.

சுவிட்சர்லாந்து சர்வதேச விவகாரங்களில் பல தசாப்தங்களாக எந்தவொரு பக்கமும் சாராமல் 'நடுநிலை நாடாக' விளங்கி வருகிறது. எனினும், உக்ரைன் மீதான ரஷ்யாவின் படையெடுப்பை அடுத்து, ஐரோப்பிய ஒன்றியத்தின் (EU) ரஷ்யாவிற்கு எதிரான பொருளாதாரத் தடைகளைச் சுவிஸ் அரசும் அமல்படுத்தியது. இதற்குச் சுவிஸ் மக்கள் கட்சி (SVP) உள்ளிட்ட தீவிர வலதுசாரி அமைப்புகள் கடும் எதிர்ப்புத் தெரிவித்து வந்தன. இது நாட்டின் பாரம்பரிய நடுநிலைத் தன்மையைக் கேள்விக்குறியாக்குவதாக அவர்கள் குற்றம் சாட்டினர்.

இதனையடுத்து, நடுநிலைமைக் கொள்கையைச் சுவிஸ் அரசியல் சாசனத்தில் இன்னும் கடுமையாக்கக் கோரி,Neutrality Initiative என்ற பெயரில் பொதுமக்களிடம் ஒரு லட்சம் கையெழுத்துகள் பெறப்பட்டு இந்த வாக்கெடுப்பு கொண்டு வரப்பட்டுள்ளது. மக்கள் இதற்கு 'ஆம்' என்று வாக்களித்தால்,

1.சுவிட்சர்லாந்து இனி எந்தவொரு சர்வதேசப் பொருளாதாரத் தடைகளிலும் பங்கேற்க முடியாது.

2.எந்தவொரு இராணுவக் கூட்டமைப்பிலும் இணைய முடியாது.

அரசியல் முக்கியத்துவம் வாய்ந்த இந்த வாக்கெடுப்பில் வெற்றி பெற, ஆதரவு மற்றும் எதிர்ப்புத் தெரிவிக்கும் இருதரப்பு அமைப்புகளும் தீவிர பிரசாரத்தில் ஈடுபட்டுள்ளன. சுவிஸ் நடுநிலைமைக் குழுவின் அதிகாரப்பூர்வத் தரவுகளின்படி, இதுவரை வாக்கெடுப்பு பிரசாரங்களுக்காகச் சுமார் 8 மில்லியனுக்கும் அதிகமான சுவிஸ் பிராங்குகள் செலவிடப்பட்டுள்ளன.

சுவிஸ் நாட்டின் எதிர்காலப் பொருளாதார மற்றும் வெளியுறவுக் கொள்கையைத் தீர்மானிக்கப் போகும் இந்த வாக்கெடுப்பை ஐரோப்பிய நாடுகள் உற்று நோக்கி வருகின்றன.