சீனாவுக்கு வெளியே காலடி வைக்கும் Bilibili: உலகளாவிய பயனர்களுக்குப் புதிய அப்டேட்!

உலகளாவிய பயனர்களைக் கவரும் வகையில் தனது செயலியை புதுப்பித்துள்ளது சீனாவின் Bilibili.

உலகளவில் வீடியோ பகிர்வு தளங்களில் ஆதிக்கம் செலுத்தி வரும் 'யூடியூப்' தளத்திற்குச் சவாலாக, சீனாவின் முன்னணி வீடியோ தளமான Bilibili தனது சர்வதேசச் செயலியைப் புதுப்பித்துள்ளது.

சீனாவில் 35 கோடிக்கும் அதிகமான பயனர்களைக் கொண்டுள்ள Bilibili, தற்போது சீனாவுக்கு வெளியே உள்ள சர்வதேசப் பயனர்களும் மிகச் சுலபமாகப் பதிவு செய்து பயன்படுத்தும் வகையில் தனது தளத்தை மாற்றியமைத்துள்ளது.

புதிய அம்சங்கள்:

எளிமையான பதிவுமுறை :

முன்னதாகச் சீன தொலைபேசி எண்கள் அல்லது கடுமையான சரிபார்ப்பு முறைகள் தேவைப்பட்ட நிலையில், தற்போது சர்வதேசப் பயனர்கள் மின்னஞ்சல் மற்றும் சமூக வலைத்தளக் கணக்குகள் மூலமாகவே எளிதாகப் பதிவு செய்ய வழிவகை செய்யப்பட்டுள்ளது.

பன்மொழிச் சேவை :

ஆங்கிலம் உட்படப் பல சர்வதேச மொழிகளில் இடைமுகமும் , வீடியோக்களுக்கான தானியங்கித் துணைத் தலைப்புகளும் மேம்படுத்தப்பட்டுள்ளன.

அனுபவம்:

Bilibili-ன் தனித்துவமான 'புல்லட் கமெண்ட்ஸ்' அம்சம் தற்போது சர்வதேசப் பயனர்களுக்கும் உகந்த வகையில் மாற்றப்பட்டுள்ளது. இதன் மூலம் பயனர்கள் வீடியோ ஓடும்போதே திரையில் தோன்றும் கருத்துக்கள் வழியே மற்றவர்களுடன் நிகழ்நேரத்தில் உரையாட முடியும்.

கிரியேட்டர்களை ஈர்க்கும் முயற்சி

சர்வதேச அளவில் பிரபலமான பல யூடியூபர்கள் மற்றும் டிஜிட்டல் கிரியேட்டர்கள் ஏற்கனவே Bilibili-ல் இணைந்து தங்கள் கணக்குகளைத் தொடங்கியுள்ளனர்.

அனிமேஷன், கேமிங், கல்வி மற்றும் லைஃப்ஸ்டைல் வீடியோக்களுக்குப் பெயர் பெற்ற இந்தத் தளம், சர்வதேசக் கிரியேட்டர்களுக்குப் புதிய வருவாய் வாய்ப்புகளையும் வழங்கி வருவதாகத் தெரிவித்துள்ளது.

Bilibili-ன் இந்தச் சர்வதேச நகர்வு யூடியூப்பிற்கு ஒரு வலுவான போட்டியாக அமையும் எனத் தொழில்நுட்ப வல்லுநர்கள் கருத்து தெரிவித்து வருகின்றனர்.