சோழவந்தான் : 3 நாட்களாக உடைந்து ஓடும் குடிநீர் குழாய் - லட்சக்கணக்கான லிட்டர் தண்ணீர் வீண்!

மதுரை மாவட்டம் சோழவந்தானில் கடந்த 3 நாட்களாகப் பிரதான குடிநீர் குழாய் உடைந்து பல லட்சம் லிட்டர் தண்ணீர் வீணாகச் சாலையில் பெருக்கெடுத்து ஓடுகிறது. இதனால் அந்த வழியே செல்லும் பொதுமக்களும் வாகன ஓட்டிகளும் கடந்து செல்ல முடியாமல் கடும் சிரமத்திற்கு ஆளாகியுள்ளனர்.

மதுரை மாவட்டம் சோழவந்தான் திருவேங்கடம் பள்ளிவாசல் பகுதியில் அமைக்கப்பட்டுள்ள பிரதான குடிநீர் விநியோகக் குழாயில் கடந்த 3 நாட்களுக்கு முன்பு திடீரென உடைப்பு ஏற்பட்டது. சோழவந்தானிலிருந்து திருமங்கலம் நோக்கிச் செல்லும் இந்த பிரதான கூட்டுக்கடிநீர் திட்டம் மூலம் நாள்தோறும் ஆயிரக்கணக்கான மக்களுக்குத் தண்ணீர் விநியோகம் செய்யப்பட்டு வருகிறது.

இந்நிலையில், குழாயில் ஏற்பட்ட பெரிய உடைப்பு காரணமாகச் சுத்திகரிக்கப்பட்ட குடிநீர் கட்டுக்கடங்காமல் வீணாகச் சாலையில் ஆறாகப் பெருக்கெடுத்து ஓடுகிறது. கடந்த 3 நாட்களாகத் தொடர்ந்து தண்ணீர் வெளியேறி வருவதால், பல லட்சம் லிட்டர் நன்னீர் வீணாகக் கழிவுநீரில் கலக்கும் அவல நிலை ஏற்பட்டுள்ளது.

இதனால் திருவேங்கடம் பள்ளிவாசல் பகுதிச் சாலை முழுவதும் தண்ணீர் தேங்கிச் சேறும் சகதியுமாகக் காணப்படுகிறது. அவ்வழியாகச் செல்லும் பள்ளி மாணவர்கள், முதியோர்கள் மற்றும் இருசக்கர வாகன ஓட்டிகள் நிலைதடுமாறி விழும் அபாயம் நிலவுவதுடன், கடுமையான போக்குவரத்து நெரிசலும் ஏற்பட்டுள்ளது.

குடிநீர்ப் பற்றாக்குறை நிலவும் சூழலில், பல லட்சம் லிட்டர் தண்ணீர் தொடர்ச்சியாக வீணாவது குறித்தும், அதிகாரிகளின் அலட்சியப் போக்கு குறித்தும் அப்பகுதி மக்கள் கடும் வேதனையும் கொந்தளிப்பும் அடைந்துள்ளனர்.

சம்பந்தப்பட்ட குடிநீர் வடிகால் வாரிய அதிகாரிகளும் உள்ளாட்சி நிர்வாகமும் உடனடியாகத் தலையிட்டு, உடைந்த குடிநீர் குழாயைச் சீரமைத்துத் தடையற்ற குடிநீர் விநியோகத்தை உறுதி செய்ய வேண்டும் என அப்பகுதி பொதுமக்களும் வாகன ஓட்டிகளும் கோரிக்கை விடுத்துள்ளனர்.