தூய்மைச் சென்னை இலக்கு: பயன்பாடற்ற பொருட்களை வீடுகளுக்கே சென்று அகற்ற மாநகராட்சி நடவடிக்கை!

பெருநகர சென்னை மாநகராட்சி எல்லைக்குட்பட்ட பகுதிகளில் வீடுகளில் தேங்கிக் கிடக்கும் பெரிய அளவிலான கழிவுகள் மற்றும் பழைய பொருட்களை நேரடியாக வீடுகளுக்கே சென்று சேகரித்து அழிக்கும் புதிய திட்டத்தை சென்னை மாநகராட்சி அறிமுகப்படுத்தியுள்ளது. இத்திட்டத்திற்கு பொதுமக்கள் மத்தியிலும் சமூக ஆர்வலர்கள் மத்தியிலும் அமோக வரவேற்பு கிடைத்துள்ளது.

பொதுவாக வீடுகளில் பயன்பாடற்று இருக்கும் பழைய Furniture, மெத்தைகள், உடைந்த பிளாஸ்டிக் பொருட்கள், பயன்படுத்த முடியாத எலக்ட்ரானிக் கழிவுகள் (E-waste) மற்றும் கட்டிடக் கழிவுகளை அப்புறப்படுத்துவது பொதுமக்களுக்குப் பெரும் சிரமமாக இருந்து வந்தது.

பலரும் இவற்றை தெருவோரங்களிலோ, திறந்தவெளிகளிலோ அல்லது நீர்நிலைகளுக்கோ அருகில் கொட்டி வந்ததால், சுற்றுப்புறச் சூழல் பாதிக்கப்படுவதோடு சுகாதாரச் சீர்கேடும் ஏற்பட்டு வந்தது. இதற்கு நிரந்தரத் தீர்வுகாணும் நோக்கில் சென்னை மாநகராட்சி இச்சேவையைத் தொடங்கியுள்ளது.

பொதுமக்கள் தங்கள் வீடுகளில் உள்ள பழைய கழிவுப் பொருட்களை அகற்ற மாநகராட்சியின் நம்ம சென்னை செயலி (Namma Chennai App) மூலமாகவோ அல்லது உதவி தொலைபேசி எண் மூலமாகவோ முன்பதிவு செய்யலாம்.

கோரிக்கை பதிவு செய்யப்பட்டதும், குறிப்பிட்ட பகுதி தூய்மைப் பணியாளர்கள் மற்றும் வாகனம் பொதுமக்களின் வீடுகளுக்கே நேரடியாகச் சென்று கழிவுகளைப் பெற்றுக் கொள்ளும்.

சேகரிக்கப்படும் பொருட்கள் வகைபிரிக்கப்பட்டு, மறுசுழற்சி செய்யக்கூடியவை அதற்கு அனுப்பப்படும்; மற்றவை சுற்றுப்புறச் சூழலுக்குப் பாதிப்பில்லாத வகையில் முறைப்படி அழிக்கப்படும்.

இத்திட்டம் குறித்துப் பேசிய பகுதிவாசிகள், "பழைய மெத்தைகள் மற்றும் உடைந்த மரச்சாமான்களை வீட்டை விட்டு வெளியேற்றுவது மிகப்பெரிய சவாலாக இருந்தது. இப்போது மாநகராட்சியே நேரடியாக வந்து பெற்றுக்கொள்வது மிகப்பெரிய உதவியாக உள்ளது" எனத் தெரிவித்தனர்.

தெருவோரங்களில் குப்பைகள் தேங்குவதைக் கட்டுப்படுத்தவும், சென்னையைத் தூய்மையாகவும் அழகாகவும் பராமரிக்கவும் இந்த நடவடிக்கை பெரிதும் உதவும் எனச் சமூக ஆர்வலர்கள் பாராட்டு தெரிவித்துள்ளனர்.