கடலோர விதிமீறல் கட்டிடம்: 21 பங்களாக்களுக்குக் கெடு விதித்தது சென்னை மாநகராட்சி!

சென்னை கிழக்குக் கடற்கரைச் சாலையில் (ECR) கடலோர ஒழுங்குமுறை மண்டல (CRZ) விதிகளை மீறி கட்டப்பட்டுள்ள ஆடம்பர பங்களாக்கள் மற்றும் கட்டிடங்களை 15 நாட்களுக்குள் காலி செய்ய வேண்டும் என்று பெருநகர சென்னை மாநகராட்சி அதிரடி நோட்டீஸ் அனுப்பியுள்ளது.

நீலாங்கரை, ஈஞ்சம்பாக்கம் மற்றும் உத்தண்டி ஆகிய கடலோரப் பகுதிகளில் அமைந்து அமைந்துள்ள சுமார் 21 ஆடம்பர பங்களாக்கள் மற்றும் வீடுகளுக்கு இந்த வெளியேற்ற நோட்டீஸ் வழங்கப்பட்டுள்ளது.

CRZ-II விதிகளின்படி, அனுமதி அளிக்கப்பட்ட எல்லைகளைத் தாண்டி மற்றும் அனுமதிக்கப்பட்ட கட்டிடப் பரப்பு குறியீட்டை (FSI 0.8) விட அதிகமாகக் கூடுதல் தளங்கள் கட்டப்பட்டிருப்பது ஆய்வில் கண்டறியப்பட்டுள்ளது.

நோட்டீஸ் வழங்கப்பட்ட நாளிலிருந்து 15 நாட்களுக்குள் கட்டிடங்களைச் உரிமையாளர்கள் காலி செய்ய வேண்டும். தவறும்பட்சத்தில் மாநகராட்சி அதிகாரிகளால் கட்டிடங்களுக்குப் பூட்டு போட்டு சீல் வைக்கப்பட்டு, இடிக்கும் நடவடிக்கை தொடங்கும் என எச்சரிக்கப்பட்டுள்ளது.

மேலும் 3 வீடுகளின் உரிமையாளர்களுக்கு விதிமீறல்களை உடனடியாகச் சீரமைக்க மாநகராட்சி உத்தரவிட்டுள்ளது.

கடலோரப் பகுதிகளில் விதிமீறலில் ஈடுபட்டதாகக் கடந்த காலங்களில் கண்டறியப்பட்ட கட்டிட உரிமையாளர்களின் மேல்முறையீட்டு மனுக்களை வீட்டுவசதி மற்றும் நகர்ப்புற வளர்ச்சித் துறை அண்மையில் தள்ளுபடி செய்தது. இதனைத் தொடர்ந்தே சென்னை மாநகராட்சி இந்த அதிரடி நடவடிக்கையில் இறங்கியுள்ளது.

சுற்றுச்சூழலைப் பாதுகாக்கும் நோக்கில் கடலோரப் பகுதி முழுவதிலும் தொடர்ந்து ஆய்வு நடத்தப்பட்டு வருவதுடன், விதிமீறி கட்டப்பட்ட மேலும் பல கட்டிடங்கள் மீதும் அடுத்தடுத்த நடவடிக்கைகள் பாயும் என அதிகாரிகள் தெரிவித்துள்ளனர்.