ஓமன் கடற்பரப்பில் ஏவுகணைத் தாக்குதலுக்கு உள்ளான வணிகக் கப்பல்: இந்திய மாலுமி பரிதாபப் பலி!

ஓமன் நாட்டின் முக்கிய கடல்சார் பாதையில் சென்று கொண்டிருந்த குறித்த சரக்குக் கப்பலை இலக்கு வைத்து இந்தத் திடீர் தாக்குதல் நடத்தப்பட்டுள்ளது. ஏவுகணை தாக்குதலுக்குள்ளானதில் கப்பலின் ஒரு பகுதி பலத்த சேதமடைந்ததுடன், உடனடியாகத் தீப்பற்றி எரிந்தது.

இத்தாக்குதலின் போது கப்பலில் பணியில் இருந்த இந்திய மாலுமி ஒருவர் பலத்த காயமடைந்து சம்பவ இடத்திலேயே உயிரிழந்தார். தகவல் அறிந்ததும் ஓமன் கடற்படை மற்றும் கடல்சார் மீட்புக் குழுவினர் சம்பவ இடத்திற்கு விரைந்து, கப்பலில் இருந்த ஏனைய மாலுமிகளைப் பாதுகாப்பாக மீட்கும் நடவடிக்கைகளில் ஈடுபட்டனர்.

உயிரிழந்த இந்திய மாலுமியின் உடலை தாயகம் கொண்டு வருவதற்கும், கப்பலில் உள்ள ஏனைய இந்தியர்களின் பாதுகாப்பை உறுதி செய்வதற்கும் ஓமானில் உள்ள இந்திய தூதரகம் அங்குள்ள அதிகாரிகளுடன் இணைந்து தீவிர நடவடிக்கைகளை மேற்கொண்டு வருகிறது.

செங்கடல் மற்றும் ஓமன் வளைகுடா பகுதிகளில் சர்வதேசக் கப்பல்கள் மீதான தாக்குதல்கள் அதிகரித்து வரும் நிலையில், இச்சம்பவம் சர்வதேச கடல்சார் வர்த்தகத் துறையில் பெரும் அதிர்ச்சியையும் கவலையையும் ஏற்படுத்தியுள்ளது.