மும்பையில் 'டிஜிட்டல் கைது' மோசடி: 10 நாட்கள் பயமுறுத்தி ₹3.83 கோடியை பறித்த கும்பல்!

பஹல்காம் பயங்கரவாத தாக்குதலில் தொடர்பு என மிரட்டி ஓய்வுபெற்ற வங்கி மேலாளரிடம் ரூ. 3.83 கோடி சுருட்டல்! 'டிஜிட்டல் கைது' மோசடி சம்பவம் மும்பையில் பெரும் அதிர்ச்சியை ஏற்படுத்தியுள்ளது!  

தீவிரவாத தடுப்புப் படை (ATS) அதிகாரிகள் போல பேசிய மர்ம நபர்கள், பாதிக்கப்பட்ட முதியவரின் பெயரில் உள்ள சிம் கார்டு மற்றும் வங்கி கணக்கு பஹல்காம் பயங்கரவாத தாக்குதலுக்கு ரூ. 7 கோடி நிதி திரட்ட பயன்படுத்தப்பட்டுள்ளதாக மிரட்டியுள்ளனர்.  

கைது செய்யாமல் இருக்க ஒத்துழைக்க வேண்டும் எனக் கூறி, வாட்ஸ்அப் வீடியோ அழைப்பு மூலம் சுமார் 10 நாட்கள் அவரைத் தொடர் கண்காணிப்பிலேயே வைத்திருந்துள்ளனர். 

ரிசர்வ் வங்கி மற்றும் ATS பெயரில் போலி ஆவணங்களை அனுப்பி, விசாரணை முடியும் வரை சேமிப்பு நிதியை குறிப்பிட்ட கணக்குகளுக்கு மாற்ற வைத்துள்ளனர்.  

தொடர்ந்து பணம் கேட்டதால் சந்தேகமடைந்த முதியவர், வங்கி மேலாளரைச் சந்தித்து பேசிய பிறகே இது 'டிஜிட்டல் கைது' என்ற பெயரில் நடந்த சைபர் மோசடி எனத் தெரியவந்தது. சைபர் ஹெல்ப்லைன் 1930 மூலம் அளிக்கப்பட்ட புகாரின் பேரில், மும்பை மேற்கு மண்டல சைபர் குற்றப்பிரிவு போலீசார் வழக்குப்பதிவு செய்து தீவிர விசாரணை நடத்தி வருகின்றனர்.

காவல்துறையோ அல்லது அரசு அமைப்புகளோ வீடியோ காலில் யாரையும் 'டிஜிட்டல் கைது' செய்ய முடியாது. இதுபோன்ற போலி அழைப்புகள் வந்தால் உடனே 1930 என்ற சைபர் ஹெல்ப்லைன் எண்ணிற்கு தொடர்பு கொள்ளுங்கள்!