குழந்தைகள் பாதுகாப்பில் அதிரடி திருப்பம்: இந்திய அரசுடன் கை கோர்த்த மெட்டா நிறுவனம்!

வாட்ஸ்அப், ஃபேஸ்புக் மற்றும் இன்ஸ்டாகிராம் ஆகியவற்றின் தாய் நிறுவனமான மெட்டா, இனி குழந்தைகளுக்கெதிரான குற்றங்கள் குறித்த தகவல்களை நேரடியாக இந்திய உள்துறை அமைச்சகத்தின் ‘சைபர் கிரைம் போர்ட்டலுக்கு’ (I4C) வழங்க சம்மதம் தெரிவித்துள்ளது.  

இதுவரை அமெரிக்காவைச் சேர்ந்த தொண்டு நிறுவனங்கள் மூலமாகவே இதுபோன்ற தகவல்கள் இந்திய அதிகாரிகளுக்குப் பகிரப்பட்டு வந்த நிலையில், தற்போது நேரடியாகவே இந்திய சைபர் பாதுகாப்பு அதிகாரிகளுக்குத் தகவல் தெரிவிக்கப்படும் என மெட்டா அதிகாரப்பூர்வமாக அறிவித்துள்ளது.  

குழந்தைகள் தொடர்பான பாலியல் குற்றங்கள் மற்றும் ஆபத்தான உள்ளடக்கங்களை உடனடியாகக் கண்டறிந்து, குற்றவாளிகள் மீது விரைந்து நடவடிக்கை எடுக்க இந்தத் திட்டம் வழிவகுக்கும்.

"இந்தியாவில் இயங்கும் அனைத்து சமூக வலைதளப் பக்கங்களுக்கும் குழந்தைகளின் இணையதளப் பாதுகாப்பு என்பது எவ்வித நிபந்தனையுமற்ற மிக முக்கியமான கடமையாகும்" என்று மத்திய அரசு மீண்டும் திட்டவட்டமாக எச்சரித்துள்ளது.