எலான் மஸ்க்கின் ஸ்பேஸ் எக்ஸ் ராக்கெட் மோதியதில் உருவான பிரம்மாண்ட பள்ளம்: நாசா தகவல்!

எலான் மஸ்க்கின் SpaceX நிறுவனத்திற்குச் சொந்தமான ராக்கெட் பாகம் ஒன்று நிலவில் மோதியதில் உருவான பிரம்மாண்ட பள்ளத்தின் புகைப்படங்களை அமெரிக்க விண்வெளி ஆய்வு மையமான நாசா தற்போது வெளியிட்டுள்ளது. விண்வெளி அறிவியல் வட்டாரத்தில் பெரும் பேசுபொருளாகியுள்ளது,

கடந்த வருடம் ஜனவரியில் ஃபயர்ப்ளை ஏரோஸ்பேஸ் நிறுவனத்தின் நிலவு லேண்டரைச் சுமந்து சென்று விண்ணில் பாய்ந்த ராக்கெட்டின் மேல் அடுக்கு Falcon 9 upper stage, விண்வெளியில் எரிபொருள் தீர்ந்து கட்டுப்பாட்டை இழந்து மிதந்து வந்தது.

கடந்த ஆகஸ்ட் 5-ஆம் தேதி, சுமார் 4 டன் எடையுள்ள இந்த ராக்கெட் கழிவு பாகம் மணி நேரத்திற்கு சுமார் 5,400 மைல்கள் (தோராயமாக 8,700 கி.மீ) வேகத்தில் நிலவின் மேற்பரப்பில் மோதியது.

நிலவில் மோதியதால் ஏற்பட்ட பள்ளத்தை ஆய்வு செய்வதற்காக நாசாவின் LRO விண்கலம் சில நாட்களாகத் தீவிரமாக முயன்று, ஆகஸ்ட் 11 மற்றும் 12 ஆகிய தேதிகளில் துல்லியமான படங்களைப் பதிவு செய்து வெளியிட்டுள்ளது.

நாசாவின் விஞ்ஞானிகள் வெளியிட்டுள்ள தரவுகளின்படி, நிலவில் மோதிய இந்தத் தாக்கத்தால் 60 அடி (சுமார் 18 மீட்டர்) அகலமும், 10 அடிக்கும் குறைவான ஆழமும் கொண்ட புதிய பள்ளம் உருவாகியுள்ளது.

இந்த மோதலின் காரணமாக நிலவின் மேல்பரப்பில் உள்ள தூசிகள் மற்றும் பல மில்லியன் ஆண்டுகளாகக் கதிர்வீச்சால் பாதிக்கப்பட்ட பாறைத் துகள்கள் வெளியாகி, பள்ளத்தைச் சுற்றிலும் வெளிச்சமான மற்றும் இருண்ட நிறக் கோடுகளாகப் பரவியிருப்பதை நாசா புகைப்படங்கள் தெளிவாகக் காட்டுகின்றன.

விண்வெளிக் கழிவுகள் பூமியை மட்டுமல்லாமல், மற்ற கோள்கள் மற்றும் நிலவின் பரப்பையும் எவ்வாறு பாதிக்கின்றன என்பதை இந்தச் சம்பவம் வெளிச்சம் போட்டுக் காட்டியுள்ளது. அதேசமயம், இந்த விண்கல மோதல் நிலவின் உட்பகுதி மற்றும் அமைப்பு குறித்த புதிய அறிவியல் ஆய்வுகளுக்குப் பெரிதும் உதவும் என விஞ்ஞானிகள் நம்புகின்றனர்.