‘வெற்றிப் பயணம்’ பெயரில் மகளிர் கட்டணமில்லாப் பயணம் விரிவாக்கம் - முதல்வர் விஜய் அதிரடி அறிவிப்பு!

தமிழ்நாட்டில் பெண்களின் பொருளாதாரச் சுதந்திரம் மற்றும் பாதுகாப்பை உறுதி செய்யும் வகையில், மகளிருக்கான கட்டணமில்லா பேருந்துப் பயணம் 'வெற்றிப் பயணம்' என்ற பெயரில் மேலும் விரிவாக்கம் செய்யப்படுவதாக முதலமைச்சர் சி. ஜோசப் விஜய் அவர்கள் அறிவித்துள்ளார்.

தமிழ்நாடு சட்டப்பேரவையில் இன்று (திங்கட்கிழமை) விதி 110-ன் கீழ் உரையாற்றிய முதலமைச்சர் விஜய், தேசத் தந்தை மகாத்மா காந்தியடிகளின் பிறந்தநாளான வரும் அக்டோபர் 2-ஆம் தேதி முதல் இத்திட்டம் நடைமுறைக்கு வரும் என்று அதிகாரப்பூர்வமாக அறிவித்தார்.

திட்டத்தின் முக்கிய அம்சங்கள்

பேருந்து வகைகள் விரிவாக்கம்

முதற்கட்டமாக, மாநகரம் மற்றும் நகர்ப்புறங்களில் இயக்கப்படும் சாதாரண அரசுப் பேருந்துகள் மட்டுமின்றி, விரைவு , எல்.எஸ்.எஸ் மற்றும் டீலக்ஸ் பேருந்துகளிலும் மகளிர் கட்டணமில்லாமல் பயணிக்கலாம்.

புறநகர் மற்றும் மலைப் பகுதிகள்

மாவட்டங்களுக்கு இடையே பயணம் செய்ய ஏதுவாக, புறநகர் மற்றும் மலைப் பகுதிகளில் இயக்கப்படும் சாதாரண கட்டணப் பேருந்துகளிலும் மகளிர் கட்டணமின்றி பயணிக்க வழிவகை செய்யப்பட்டுள்ளது.

சிறப்புப் பயனாளிகள்

இத்திட்டமானது மாணவிகள், வேலைக்குச் செல்லும் பெண்கள், மருத்துவமனை செல்வோருக்குப் பெரும் உதவியாக இருக்கும். மேலும், மாற்றுப் பாலினத்தவர்களான திருநர்களும் இத்திட்டத்தின் மூலம் கட்டணமின்றி பயணிக்கலாம்.

கட்டுப்பாடுகள் இல்லை

இத்திட்டம் தடையின்றி கிடைக்க வருமான வரம்பு உச்சவரம்போ அல்லது பயணங்களின் எண்ணிக்கையோ எந்தவிதமான கட்டுப்பாடுகளும் நிர்ணயிக்கப்படவில்லை.

இத்திட்டத்தைச் செயல்படுத்த அரசுக்கு ஆண்டுதோறும் தோராயமாக ரூ. 6,000 கோடி செலவினம் ஏற்படும் என எதிர்பார்க்கப்படுகிறது. பெண்களின் சமூகப் பங்களிப்பை ஊக்கப்படுத்தும் இந்த அறிவிப்புக்குச் சமூக ஆர்வலர்கள் மற்றும் பொதுமக்கள் மத்தியில் பெரும் வரவேற்பு கிடைத்துள்ளது.