சுவிட்சர்லாந்தில் 75% வரை கணிசமாகக் குறைந்த போலி அதிகாரி தொலைபேசி மோசடிகள்

சுவிட்சர்லாந்தில் அரச அதிகாரிகளாக நடித்து தொலைபேசி வழியே நிதி மோசடியில் ஈடுபட்டு வந்த சம்பவங்கள் 75 சதவீதம் வரை கணிசமாகக் குறைந்துள்ளதாகத் தேசிய இணைய பாதுகாப்பு மையம் தெரிவித்துள்ளது.

கடந்த சில மாதங்களாக, காவல் துறை, சுங்கத் துறை மற்றும் நீதிமன்ற அதிகாரிகளைப் போலப் போலியாகப் பேசி, சுவிஸ் தொலைபேசி எண்களைப் பயன்படுத்தி மோசடி கும்பல்கள் பெருமளவில் மக்களை ஏமாற்றி வந்தன. ஆண்டின் தொடக்கத்தில் மாதம் ஒன்றிற்கு 400-க்கும் மேற்பட்ட வழக்குகள் பதிவாகின.

தொலைத் தொடர்பு நிறுவனங்கள் அறிமுகப்படுத்திய புதிய Anti-spoofing measures காரணமாகவே இந்த மோசடிகள் தற்போது அதிரடியாகக் குறைந்துள்ளன.

இருப்பினும், AI தொழில்நுட்பத்தைப் பயன்படுத்தி மேற்கொள்ளப்படும் புதிய வகை மோசடிகள் குறித்து மக்கள் எச்சரிக்கையுடன் இருக்குமாறு அதிகாரிகள் அறிவுறுத்தியுள்ளனர். தொலைபேசியில் முன்பின் தெரியாதவர்களிடம் தனிப்பட்ட மற்றும் வங்கித் தகவல்களைப் பகிர வேண்டாம் என்றும் கேட்டுக்கொள்ளப்படுகிறார்கள்.