குழந்தை திருமணங்களுக்கு எதிரான உலகளாவிய நடவடிக்கை: நவம்பர் 27-ஐ சிறப்பு தினமாக அறிவித்தது ஐக்கிய நாடுகள் சபை!

சர்வதேச அளவில் குழந்தை திருமணங்களை ஒழிப்பதற்கும், சிறுமிகளின் கல்வி மற்றும் உரிமைகளைப் பாதுகாப்பதற்கும் விழிப்புணர்வை ஏற்படுத்தும் வகையில், ஆண்டுதோறும் நவம்பர் 27-ஆம் தேதியை 'குழந்தை மற்றும் கட்டாயத் திருமணங்கள் ஒழிப்புக்கான சர்வதேச தினம்' (International Day for the Elimination of Child, Early and Forced Marriage) ஆக அனுசரிக்க ஐக்கிய நாடுகள் பொதுச்சபை ஒருமனதாகத் தீர்மானம் நிறைவேற்றியுள்ளது.

சியரா லியோன் நாடு முன்னெடுத்த இந்த வரலாற்றுச் சிறப்புமிக்க தீர்மானத்திற்கு, இந்தியா உட்பட 60-க்கும் மேற்பட்ட நாடுகள் ஆதரவு தெரிவித்தன. யுனிசெஃப் (UNICEF) அமைப்பின் கணக்கெடுப்பின்படி, உலகளவில் ஆண்டுதோறும் சுமார் 1 கோடியே 20 லட்சம் சிறுமிகள் குழந்தை திருமணத்திற்கு ஆளாகின்றனர் என்றும், தற்போது 64 கோடி பெண்கள் குழந்தை பருவத்திலேயே திருமண பந்தத்தில் தள்ளப்பட்ட பாதிப்பைச் சுமந்து வாழ்வதாகவும் கவலை தெரிவிக்கப்பட்டுள்ளது.

வருகின்ற 2030-ஆம் ஆண்டிற்குள் குழந்தை திருமண முறையை முற்றிலும் ஒழிப்பதை இலக்காகக் கொண்டு, அனைத்து உறுப்பு நாடுகளும் விழிப்புணர்வு பிரச்சாரங்கள் மற்றும் கண்டிப்பான சட்ட நடவடிக்கைகளை தீவிரமாக நடைமுறைப்படுத்த வேண்டும் என ஐ.நா கேட்டுக்கொண்டுள்ளது.