அமெரிக்க வாழ் இந்தியர்களுக்குப் புதிய நெருக்கடி: H-1B விசா சலுகையை ரத்து செய்ய டிரம்ப் நிர்வாகம் பரிசீலனை!

அமெரிக்காவில் பணிபுரியும் H-1B விசா வைத்திருக்கும் வெளிநாட்டு ஊழியர்கள், வேலை இழக்கும் பட்சத்தில் புதிய வேலையைக் கண்டறிய வழங்கப்படும் 60 நாட்கள் சலுகை அவகாசத்தை (Grace Period) ரத்து செய்வது குறித்து டொனால்ட் டிரம்ப் தலைமையிலான அமெரிக்க நிர்வாகம் தீவிரமாகப் பரிசீலித்து வருகிறது.

அமெரிக்கக் குடியுரிமை மற்றும் குடிவரவு சேவைகள் (USCIS) கொள்கை விதிகளின்படி, H-1B விசா மூலம் பணியாற்றும் ஊழியர் ஒருவர் வேலையை இழந்தால், அவர் வேறு நிறுவனத்தில் இணைய அல்லது அமெரிக்காவிலிருந்து வெளியேற 60 நாட்கள் கால அவகாசம் அளிக்கப்பட்டு வந்தது.

உள்நாட்டு ஊழியர்களின் வேலைவாய்ப்பைப் பாதுகாக்கும் 'அமெரிக்கப் பொருட்களை வாங்கு, அமெரிக்கர்களை வேலைக்கு அமர்த்து' கொள்கையை தீவிரப்படுத்தும் நோக்கில், இந்த சலுகை விதியை நீக்கப் பரிசீலிக்கப்பட்டு வருகிறது. இந்த திட்டம் அமலுக்கு வந்தால், வேலை இழக்கும் ஊழியர்கள் உடனடியாக அமெரிக்காவை விட்டு வெளியேற வேண்டிய கட்டாயம் ஏற்படும்.

அமெரிக்காவில் H-1B விசா மூலம் பணிபுரிபவர்களில் பெரும்பான்மையானவர்கள் இந்தியத் தகவல் தொழில்நுட்ப (IT) வல்லுநர்கள் ஆவர். குறிப்பாக, உலகளாவிய தகவல் தொழில்நுட்பத் துறையில் ஆட்குறைப்பு நடவடிக்கைகள் தீவிரமடைந்துள்ள சூழலில், இந்த 60 நாள் அவகாசம் ரத்து செய்யப்பட்டால் ஆயிரக்கணக்கான இந்தியக் குடும்பங்களின் எதிர்காலம் கேள்விக்குறியாகும் அபாயம் உருவாகியுள்ளது.