ஆலங்கட்டி புயலால் முடங்கிய சுவிஸ் வான்வழிப் போக்குவரத்து: விமான நிலைய ஓடுபாதைகளில் பணிகள் அதிரடி நிறுத்தம்!

சுவிட்சர்லாந்து முழுவதும் திடீரெனப் பதிவாகியுள்ள மிகக் கடுமையான இடியுடன் கூடிய புயல் மற்றும் ஆலங்கட்டி மழை காரணமாக நாட்டின் வான்வழிப் போக்குவரத்து கடுமையாகப் பாதிக்கப்பட்டுள்ளது. முக்கியமாக Zurich Airport செயல்பாடுகள் முடங்கியதால் ஆயிரக்கணக்கான உள்நாட்டு மற்றும் சர்வதேசப் பயணிகள் பெரும் அவதிக்குள்ளாகியுள்ளனர்.

சுவிஸ் பிராந்தியங்களில் கடந்த சில தினங்களாக நிலவி வரும் மோசமான காலநிலையால், Zurich வான்பரப்பில் தொடர் மின்னல் தாக்கங்கள் பதிவாகின. விமான நிலையத்தின் Apron Area மற்றும் ஓடுபாதைகளில் பாதுகாப்பு காரணங்களுக்காக ஊழியர்கள் தற்காலிகமாகப் பணிகளை நிறுத்த வேண்டிய கட்டாயம் ஏற்பட்டது. இதனால் விமானங்களுக்கு எரிபொருள் நிரப்புதல், சரக்குகளை ஏற்றி இறக்குதல் போன்ற பணிகள் முழுமையாக ஸ்தம்பித்தன.

இதன் காரணமாக, சுவிஸ் சர்வதேச ஏர்லைன்ஸ் (SWISS) நிறுவனம் Zurich விமான நிலையத்திலிருந்து இயக்கப்படவிருந்த மற்றும் அங்கு வரவிருந்த 85க்கும் மேற்பட்ட விமான சேவைகளை அதிரடியாக ரத்து செய்துள்ளது. இதனால் ஒரே நாளில் சுமார் 3,100க்கும் மேற்பட்ட பயணிகள் நேரடியாகப் பாதிக்கப்பட்டுள்ளனர். மேலும் பல விமானங்கள் 3 மணித்தியாலங்களுக்கும் மேலாகத் தாமதமாக இயக்கப்பட்டன. பல சர்வதேச விமானங்கள் அண்டை நாடுகளின் விமான நிலையங்களுக்குத் திருப்பி விடப்பட்டுள்ளன.

விமான நிலையப் பகுதியில் ஆலங்கட்டி மழை மற்றும் பலத்த காற்று வீசி வருவதால், வானிலை சீராகும் வரை இந்தத் தாமதங்கள் நீடிக்கலாம் எனத் தெரிவிக்கப்பட்டுள்ளது. பயணிகள் தங்களின் விமானங்களின் தற்போதைய நிலவரத்தை இணையதளம் வாயிலாகச் சரிபார்த்த பின்னரே விமான நிலையத்திற்குப் புறப்படுமாறு சுவிஸ் ஏர்லைன்ஸ் நிர்வாகம் அவசரக் கோரிக்கை விடுத்துள்ளது.