சுவிட்சர்லாந்தில் வெப்ப அலை: பாலாடைக்கட்டி உற்பத்திக்கு பெரும் பாதிப்பு

அதிகரித்து வரும் வெப்பநிலை காரணமாக மாடுகள் கடும் உடல் அழுத்தத்திற்கு உள்ளாகி, தீவனம் உண்பது குறைந்துள்ளது. இதனால் பசுக்களின் பால் உற்பத்தி பெருமளவு சரிவடைந்துள்ளது. அதே நேரத்தில், போதிய மழையில்லாததால் புல்வெளிகள் காய்ந்து போய், கால்நடைகளுக்கான பசுந்தீவனத் தட்டுப்பாடு ஏற்பட்டுள்ளது. 

 நிலைமை மிகவும் கவலைக்கிடமாக இருப்பதாக தெரிவித்துள்ள ஸ்விஸ் பால் உற்பத்தியாளர்கள் கூட்டமைப்பு, பல விவசாயிகள் வரவிருக்கும் இலையுதிர் மற்றும் குளிர்காலத்திற்காகச் சேமித்து வைத்திருந்த தீவனங்களை இப்பொழுதே பயன்படுத்த வேண்டிய கட்டாயத்திற்குத் தள்ளப்பட்டுள்ளதாகக் கூறியுள்ளனர்.  

புகழ்பெற்ற ‘குரூயர்’ (Gruyère) பாலாடைக்கட்டி அமைப்பின் இயக்குனர் ஒலிவியே இஸ்லர் தெரிவிக்கையில், இந்த வறட்சியால் பாலாடைக்கட்டி உற்பத்தி கடந்த ஆண்டை விட சுமார் 10 சதவீதம் வரை குறையக்கூடும் என்று எச்சரித்துள்ளார்.

 பருவநிலை மாற்றத்தின் காரணமாக ஏற்படும் இந்த அசாதாரண வானிலை, மலைப்பகுதி பாலாடைக்கட்டி உற்பத்தியாளர்களுக்குப் பெரும் சவாலாக மாறியுள்ளது. உடனடி மழை பொழிவும் இயல்பான வெப்பநிலையும் திரும்புவது மட்டுமே இதற்குத் தீர்வாக அமையும் எனப் பண்ணையாளர்கள் எதிர்பார்க்கின்றனர்.