காவிரி நீர்ப்பிடிப்பு பகுதிகளில் கனமழை: ஒகேனக்கல்லுக்கு நீர்வரத்து 8,000 கன அடியாக அதிகரிப்பு!

கர்நாடக மாநிலத்தின் காவிரி நீர்ப்பிடிப்புப் பகுதிகள் மற்றும் எல்லைப் பகுதிகளில் கடந்த சில நாட்களாக கனமழை பெய்து வருகிறது. இதன் காரணமாகக் கே.ஆர்.எஸ் மற்றும் கபினி அணைகளில் இருந்து உபரி நீர் திறந்து விடப்பட்டுள்ளதுடன், அஞ்செட்டி, பிலிகுண்டுலு உள்ளிட்ட எல்லைப் பகுதிகளிலும் மழை பொழிந்து வருகிறது.

இதனால், நேற்று வரை குறைந்த அளவில் வந்து கொண்டிருந்த நீர்வரத்து, இன்று காலை நிலவரப்படி வினாடிக்கு 8,000 கன அடியாக அதிகரித்துள்ளது.

நீர்வரத்து அதிகரித்துள்ளதால் ஒகேனக்கல்லில் உள்ள முதன்மை அருவி, ஐந்தருவி உள்ளிட்ட நீர்வீழ்ச்சிகளில் தண்ணீர் ஆர்ப்பரித்துக் கொட்டுகிறது. இந்த அழகிய காட்சியைக் காணவும், பரிசலில் சென்று மகிழவும் ஏராளமான சுற்றுலாப் பயணிகள் ஒகேனக்கல்லில் குவிந்து வருகின்றனர்.

நீர்வரத்து மேலும் அதிகரிக்கக்கூடும் என்பதால், பிலிகுண்டுலு பகுதியில் மத்திய நீர் வள ஆணைய அதிகாரிகள் நீர்வரத்தின் அளவைத் தொடர்ச்சியாகக் கண்காணித்து வருகின்றனர். மேலும், ஆற்றின் கரையோரப் பகுதிகளில் அசம்பாவிதங்கள் எதுவும் ஏற்படாத வண்ணம் வருவாய்த்துறை மற்றும் காவல்துறை அதிகாரிகள் தீவிர கண்காணிப்புப் பணியில் ஈடுபட்டுள்ளனர்.