வங்கக் கடலில் பிரமாண்ட சரக்குக் கப்பல் விபத்து: 22 மாலுமிகளைத் தேடி அலைமோதும் இந்தியக் கடற்படை!

இந்தியாவின் ஒடிசா மாநிலத்தில் உள்ள பாரதீப் துறைமுகத்தில் இருந்து சிங்கப்பூர் நோக்கிப் புறப்பட்ட MV Ocean Winner என்ற பிரமாண்ட சரக்குக் கப்பல் வங்காள விரிகுடா கடலில் மூழ்கி பெரும் பரபரப்பை ஏற்படுத்தியுள்ளது.

பனாமா நாட்டின் கொடியுடன், சுமார் 72,100 டன்களுக்கும் அதிகமான இரும்புத் தாதுகளை ஏற்றிச் சென்ற 225 மீட்டர் நீளமுடைய இந்த பிரமாண்ட கப்பல், கடலில் பயணித்துக் கொண்டிருந்தபோது திடீரென தொடர்பை இழந்து கடலில் மூழ்கியது.

இந்தக் கப்பலில் சீனா, மியான்மர் மற்றும் பங்களாதேஷ் ஆகிய நாடுகளைச் சேர்ந்த மொத்தம் 24 மாலுமிகள் பயணித்தனர். கப்பல் மூழ்கிய தகவல் கிடைத்ததும், இந்தியக் கடற்படை மற்றும் கடலோரக் காவல் படை இணைந்து உடனடியாகப் பிரமாண்ட தேடுதல் மற்றும் மீட்பு நடவடிக்கையில் இறங்கின.

இந்தியக் கடற்படையின் P-8I கண்காணிப்பு விமானம் கடலில் மிதந்த அவசர கால ரப்பரைப் படகுகளை அடையாளம் கண்டதை அடுத்து, அந்த வழியே சென்ற MT Aisopos என்ற வணிகக் கப்பல் மூலம் 2 மாலுமிகள் பத்திரமாக மீட்கப்பட்டுள்ளனர்.

இருப்பினும், எஞ்சிய 22 மாலுமிகள் தொடர்ந்து மாயமாகியுள்ளனர். அவர்களைத் தேடும் பணியில் இந்தியக் கடற்படை விமானங்களுடன் 'வரத்', 'அன்மோல்' மற்றும் 'விஜித்' ஆகிய ரோந்துக் கப்பல்கள் தீவிரமாக ஈடுபட்டு வருகின்றன. 

மோசமான வானிலையா அல்லது இயந்திரக் கோளாறா என கப்பல் மூழ்கியதற்கான துல்லியமான காரணம் இதுவரை தெரியவராத நிலையில், சர்வதேச கடற்படை அமைப்புகளின் உதவியுடன் தீவிர விசாரணைகளும் மீட்புப் பணிகளும் நடைபெற்று வருகின்றன.