கட்சியில் இணைந்த ஒரே மணிநேரத்தில் 15 பேருக்குக் முக்கியப் பொறுப்பு: தவெக தலைவர் விஜய் அதிரடி அறிவிப்பு!

தமிழக அரசியல் களத்தில் தீவிரமாகச் செயல்பட்டு வரும் தமிழக வெற்றிக் கழகம் (தவெக), கட்சி அமைப்பை விரிவுபடுத்தும் நடவடிக்கைகளில் வேகமெடுத்துள்ளது.

இதன் ஒருபகுதியாக, சென்னையில் உள்ள கட்சித் தலைமை அலுவலகத்தில் அக்கட்சியின் தலைவர் விஜய் தலைமையில் நடைபெற்ற நிகழ்வில் மாற்றுக் கட்சிகளைச் சேர்ந்த முக்கிய நிர்வாகிகள் பலர் தவெகவில் அதிகாரப்பூர்வமாக இணைந்தனர்.

அவ்வாறு கட்சியில் இணைந்த ஒரு மணிநேரத்திற்குள்ளேயே, அவர்களில் 15 முக்கிய நிர்வாகிகளுக்குக் கட்சியின் மாநிலத் 'துணைப் பொதுச்செயலாளர்' பதவிக்கான பணி நியமன ஆணைகளை தலைவர் விஜய் நேரில் வழங்கி அசத்தியுள்ளார்.

வருகின்ற சட்டமன்றத் தேர்தலைக் கருத்தில் கொண்டு, கட்சிப் பணிகளையும் நிர்வாகக் கட்டமைப்பையும் மேலும் வலுப்படுத்தும் நோக்கிலேயே இந்த வேகமான முடிவுகள் எடுக்கப்பட்டுள்ளதாகத் தவெக வட்டாரங்கள் தெரிவிக்கின்றன.