"இந்தியாவுக்கு நிரந்தர உறுப்பினர் அந்தஸ்து தேவை": ஐ.நா. சபையில் ரஷியா அதிரடி பேச்சு!

ஐ.நா. பொதுச்சபையின் ஆண்டு மாநாட்டில் உரையாற்றிய ரஷிய வெளியுறவுத்துறை அமைச்சர் செர்ஜி லாவ்ரோவ், வளர்ந்து வரும் சர்வதேச அரசியல் மற்றும் பொருளாதாரச் சூழலில், ஐ.நா. பாதுகாப்பு கவுன்சிலை மறுசீரமைக்க வேண்டியது காலத்தின் கட்டாயம் என்று குறிப்பிட்டார்.

இதுகுறித்து அவர் மேலும் பேசுகையில், "உலகளாவிய விவகாரங்களில் இந்தியாவின் பங்களிப்பும், ஆசிய-பசிபிக் பிராந்தியத்தில் அதன் பொருளாதார மற்றும் அரசியல் தாக்கமும் மிக முக்கியமானது. ஆப்பிரிக்கா, ஆசியா மற்றும் லத்தீன் அமெரிக்க நாடுகளுக்குப் பாதுகாப்பு கவுன்சிலில் உரிய பிரதிநிதித்துவம் அளிக்கப்பட வேண்டும். குறிப்பாக, இந்தியா மற்றும் பிரேசில் ஆகிய நாடுகள் பாதுகாப்பு கவுன்சிலில் நிரந்தர உறுப்பினர்களாக சேர்க்கப்படுவதற்கு ரஷியா முழு ஆதரவை வழங்குகிறது" எனத் தெரிவித்தார்.

உலகளவில் அதிக மக்கள் தொகை கொண்ட நாடாகவும், அதிவேகமாக வளர்ந்து வரும் பொருளாதார சக்தியாகவும் திகழும் இந்தியா, ஐ.நா. பாதுகாப்பு கவுன்சிலில் நிரந்தர இடம் பெற நீண்டகாலமாக முயற்சி செய்து வருகிறது. அமெரிக்கா, பிரான்ஸ், பிரிட்டன், ரஷியா ஆகிய வல்லரசு நாடுகள் இந்தியாவின் கோரிக்கைக்குத் தொடர் ஆதரவு தெரிவித்து வரும் நிலையில், ரஷியாவின் இந்த தற்போதைய அறிக்கை சர்வதேச அளவில் பெரும் கவனத்தைப் பெற்றுள்ளது.